ప్రభుత్వ పాఠశాలల్లో నమోదు 20,000 పెరిగింది, ప్రైవేట్ ఫీజు నియంత్రణ బిల్లు సంప్రదింపుల్లో ఉంది: డైరెక్టర్ నవీన్ నికోలస్

పాఠశాల విద్యాశాఖ డైరెక్టర్ నవీన్ నికోలస్ మాట్లాడుతూ, ప్రభుత్వ పాఠశాలల్లో గత విద్యా సంవత్సరంలో విద్యార్థుల నమోదు 20,000 పెరిగిందని తెలిపారు. ప్రస్తుత విద్యా సంవత్సరంలో పాఠశాలలు తెరిచిన రోజునే నోట్బుక్స్, టెక్స్ట్బుక్స్ అందించామని చెప్పారు.

అన్ని స్కూళ్ళలోనూ తగినంత మంది ఉపాధ్యాయులు ఉన్నారని, మిగులు ఉపాధ్యాయులను కలెక్టర్, డీఈఓ కమిటీ ద్వారా అవసరమైన స్కూళ్ళకు బదిలీ చేశామని వివరించారు. ఉపాధ్యాయుల శిక్షణ కాస్కేడ్ మోడల్లో జరుగుతుందని, సెలవుల ముందుగా ఆగస్టు లోపు పూర్తి చేస్తామని తెలిపారు. 10వ తరగతి వరకు విద్యార్థులకు కొత్త వర్క్బుక్స్ ఇస్తున్నామన్నారు.

అల్పాహారం, పాల పథకం కోసం టెండర్లు ఖరారు చేశామని, 39 కేంద్రీకృత కిచెన్లు ఏర్పాటు చేయాల్సి ఉందని తెలిపారు. ఇప్పటికే 7 కిచెన్లు పనిచేస్తుండగా, గోడౌన్లను గుర్తించి నిర్మాణం జరుగుతోందని, త్వరలో అన్నిచోట్లా పథకం అమలవుతుందని నవీన్ నికోలస్ పేర్కొన్నారు.

యూనిఫారాల విషయంలో కస్తూర్బా గాంధీ బాలికా విద్యాలయాల (కేజీబీవీ) దుస్తులు 20,000 మంది విద్యార్థులకు పంపిణీ చేశామన్నారు. ఇతర పాఠశాలల్లో కుట్టు పని ప్రారంభమైందని, త్వరలో విద్యార్థులందరికీ యూనిఫారాలు అందుతాయని చెప్పారు.

పట్టణ ప్రాంతాల్లో విద్యార్థుల సంఖ్యకు అనుగుణంగా సీఎం రేవంత్ రెడ్డి రూ.1,000 కోట్ల క్యూర్ (CURE) యాక్షన్ ప్లాన్ ప్రారంభించారని తెలిపారు. కొత్త స్కూల్ కాంప్లెక్సులు, అదనపు తరగతి గదులు, ప్రీ-ప్రైమరీ నుంచి 12వ తరగతి వరకు అప్గ్రేడ్ చేస్తున్నామని వివరించారు.

పాఠశాలల మూసివేతపై వస్తున్న ఆరోపణలను నవీన్ నికోలస్ ఖండించారు. ఒక్క విద్యార్థి ఉన్నా స్కూల్ నడుపుతామని, గ్రామాల్లో వివిధ శాఖల ఆధ్వర్యంలోని బహుళ ప్రాథమిక స్కూళ్లలో తగినంత ఉపాధ్యాయుల్ని (విద్యార్థి-ఉపాధ్యాయ నిష్పత్తి 1:17) కల్పించామని స్పష్టం చేశారు.

ప్రైవేట్ పాఠశాలల ఫీజు నియంత్రణ కోసం డ్రాఫ్ట్ బిల్లు శాఖాంతర సంప్రదింపుల దశలో ఉందని తెలిపారు. ఇప్పటికే ప్రైవేట్ స్కూళ్ల ఆడిటెడ్ ఆర్థిక నివేదికలు సేకరిస్తున్నామని, ఫీజు నిర్మాణాన్ని వెబ్‌సైట్లో ఉంచాలని ఆదేశించామని చెప్పారు. ఈ బిల్లుపై ప్రైవేట్ స్కూళ్ల యాజమాన్యాల స్పందన తెలియాల్సి ఉంది.