వర్షాలు ఎక్కువగా ఉండే ప్రాంతాల్లో వరి, మొక్కజొన్న, జొన్న సాగు సూచనలు

హైదరాబాద్ వాతావరణ కేంద్రం ప్రకారం రాష్ట్రంలో అక్కడక్కడ భారీ నుంచి అతిభారీ వర్షాలు కురిసే అవకాశం ఉంది. ఈ నేపథ్యంలో ప్రొఫెసర్ జయశంకర్ వ్యవసాయ విశ్వవిద్యాలయం శాస్త్రవేత్తలు రైతులకు సాగు యాజమాన్యంపై సూచనలు చేశారు.

ఉత్తర, మధ్య తెలంగాణ జిల్లాల్లో వరి పంటకు ఇది అనుకూల సమయం. పొడి నారు విత్తి తడి పద్ధతిలో సాగు చేయడం మంచిదని సూచించారు. నీరు ఎక్కువగా ఉన్న చోట 120-125 రోజుల స్వల్పకాలిక వరి రకాల నారుమడి పెంచుకోవాలి. నారుమడిలో నాటుకు వారం ముందు ఎకరాకు 800 గ్రాముల కార్బోప్యూరాన్ 3జి గుళికలు ఇసుకలో కలిపి చల్లాలి. ఇలా చేస్తే 15-20 రోజులు పురుగుల నుండి రక్షణ లభిస్తుంది.

25 రోజుల వయసు ఉన్న దీర్ఘకాలిక వరి రకాలను నాటాలి. నాటు తర్వాత ప్రతి రెండు మీటర్లకు కాలిబాట తీయడం వల్ల గాలి, వెలుతురు బాగా ప్రసరిస్తాయి. సుడిదోమ ఉదృతి తగ్గుతుంది. నాటిన 10-15 రోజులకు ఎకరాకు 10 కిలోల కార్బోప్యూరాన్ 3జి గుళికలు వేస్తే కాండం తొలుచు పురుగు, ఉల్లికోడు నివారించవచ్చు. వరిగట్లను శుభ్రంగా ఉంచాలి; లేకపోతే కలుపు మొక్కలపై పురుగులు ఆశించి పంటకు నష్టం కలిగిస్తాయి. ఊద, ఓడిపిలి గడ్డి కలుపు నివారణకు 7.5 మిలీలీటర్ల సైహలోఫాప్ పి బ్యూటైల్ మందును 5 లీటర్ల నీటిలో కలిపి 15 రోజుల నారుమడిపై పిచికారీ చేయాలి.

మొక్కజొన్న పంటకు కూడా సూచనలు ఇచ్చారు. జూలై 31 వరకు స్వల్పకాలిక రకాలను దిగుబడి తరగకుండా విత్తుకోవచ్చు. శాఖీయ దశలో ఎక్కువ నీరు అవసరం, ప్రత్యుత్పత్తి దశలో నీటి ఎద్దడిని తట్టుకోలేని ఈ పంటను బోదెలు, కాలువల పద్ధతిలో సాగు చేయాలి. విత్తిన 15 రోజులకు కత్తెర పురుగు నివారణకు 5 మిలీలీటర్ల వేప నూనెను 1 లీటర్ నీటిలో కలిపి పిచికారీ చేసుకోవాలి. లింగాకర్షక బుట్టలు అమర్చి పురుగుల ఉదృతిని గమనించవచ్చు. ఆఖరి దుక్కిలో మొత్తం భాస్వరంలో 1/3 వంతు, నత్రజని, సగం పొటాష్ ఇచ్చే ఎరువులు వేయాలి.

జొన్న పంట విషయంలో మవ్వ తొలుచు ఈగ కనిపిస్తే 2 మిలీలీటర్ల కార్బో సల్ఫాన్ మందును లీటర్ నీటికి కలిపి పిచికారీ చేయాలి. కాండం తొలుచు పురుగు నివారణకు విత్తిన 30-35 రోజుల దశలో ఎకరాకు 4 కిలోల కార్బోప్యూరాన్ 3జి గుళికలను కాండం సుడులలో వేయాలని శాస్త్రవేత్తలు తెలిపారు.