ఎల్ నినో కరువు: ముందస్తు చర్యలపై తెలంగాణ హైకోర్టు ప్రభుత్వానికి ఆదేశం

ఎల్ నినో ప్రభావంతో రాష్ట్రంలో ఏర్పడే నీటి కొరత, కరువు పరిస్థితులపై తెలంగాణ హైకోర్టు కీలక వ్యాఖ్యలు చేసింది. ఈ పరిస్థితులను ఎదుర్కోవడానికి ప్రభుత్వం ఎలాంటి ముందస్తు చర్యలు తీసుకుంటుందో పూర్తి వివరాలతో అఫిడవిట్ దాఖలు చేయాలని కోర్టు ఆదేశించింది.

డాక్టర్ చెరుగు సుధాకర్ దాఖలు చేసిన ప్రజా ప్రయోజన వ్యాజ్యం (PIL)పై తాత్కాలిక ప్రధాన న్యాయమూర్తి జస్టిస్ పి. శ్యాంకోషి, జస్టిస్ సుద్దాల చలపతిరావులతో కూడిన ధర్మాసనం విచారణ చేపట్టింది.

పిటిషనర్ తరఫున సీనియర్ న్యాయవాది వాదనలు వినిపించారు. ఎల్ నినో ప్రభావంతో రాష్ట్రవ్యాప్తంగా, ముఖ్యంగా హైదరాబాద్ పరిసర ప్రాంతాల్లో తీవ్రమైన కరువు పరిస్థితులు తలెత్తుతున్నాయని ఆయన కోర్టు దృష్టికి తీసుకువచ్చారు. విపత్తుల నిర్వహణ చట్టం ప్రకారం ప్రభుత్వం ముందస్తు చర్యలు తీసుకోవడం లేదని ఆరోపించారు. కరువు అంచనా నివేదికలు, ప్రామాణిక కార్యాచరణ విధానాలు, విపత్తు నిర్వహణ ప్రణాళికలను కోర్టు ముందుంచాలని కోరారు.

వాదనలు విన్న ధర్మాసనం స్పందిస్తూ, ఎల్ నినో ప్రకృతి సిద్ధమైన పరిణామం కాబట్టి దానికి ప్రభుత్వాన్ని నిందించలేమని పేర్కొంది. అయితే ప్రజలకు నీటి కొరత రాకుండా నివారణ చర్యలు చేపట్టాల్సిన బాధ్యత ప్రభుత్వంపై ఉంటుందని స్పష్టం చేసింది.

ఈ వ్యాజ్యంపై తదుపరి విచారణను డిసెంబర్ 9కి కోర్టు వాయిదా వేసింది.