PGI 2.0 ర్యాంకింగ్‌లో తెలంగాణ పది స్థానాలు మెరుగు: 18వ స్థానంలో నిలిచింది

తెలంగాణ రాష్ట్రం పర్ఫార్మెన్స్ గ్రేడింగ్ ఇండెక్స్ (PGI) 2.0 ర్యాంకింగ్స్‌లో 10 స్థానాలు మెరుగుపరచుకుంది. గత సంవత్సరం 28వ స్థానంలో ఉన్న రాష్ట్రం, ప్రస్తుతం 18వ ర్యాంకుకు చేరింది.

2024-25 విద్యా సంవత్సరంలో 552.5గా ఉన్న స్కోరు 599.7కు (1000 మార్కులకు) పెరిగింది. దీంతో ఆకాంక్షి-1 విభాగం నుంచి ప్రచేష్ట గ్రేడింగ్‌లోకి రాష్ట్రం ప్రవేశించింది. జనగాం (383), మంచిర్యాల (360) జిల్లాలు ఉత్తమ గ్రేడ్ సాధించాయి.

విద్యాశాఖ మౌలిక వసతుల కల్పన, ఉపాధ్యాయ నియామకాలు, డిజిటల్ లెర్నింగ్ ల్యాబ్‌ల ఏర్పాటు వంటి చర్యలు చేపట్టింది. 1,354 పాఠశాలల్లో ఎక్స్-స్టెప్, ఎక్స్.ఎల్ ఎఫ్ఎల్ఎన్ కార్యక్రమం ద్వారా 15,848 మంది విద్యార్థులకు ప్రాథమిక భాష, గణిత నైపుణ్యాల శిక్షణ ఇస్తున్నారు. 194 మోడల్ స్కూళ్ళు, 495 కస్తూర్బా గాంధీ బాలిక విద్యాలయాల్లో ఫిజిక్స్ వాలా, ఖాన్ అకాడమీ సహాయంతో ఉచిత డిజిటల్ కోచింగ్ అందజేస్తున్నారు. 132 బడుల్లో ఐ.సి.టి ల్యాబ్‌లు, 2,036 బడుల్లో ఇంటరాక్టివ్ ఫ్లాట్ ప్యానెల్స్ ఏర్పాటయ్యాయి. 2025-26 నుంచి ఒకటి నుంచి తొమ్మిదో తరగతి వరకు ఏఐ, కోడింగ్, డేటా హ్యాండ్లింగ్ వంటి డిజిటల్ పాఠ్యాంశాలు ప్రవేశపెట్టారు.

500 మంది ఉపాధ్యాయులు, అధికారులు అంతర్జాతీయ విద్యా విధానాల అధ్యయనం కోసం ఫిన్లాండ్, జర్మనీ పర్యటించారు. తాజా పదో తరగతి ఫలితాల్లో 95.15% ఉత్తీర్ణత నమోదవగా, 5,731 ప్రభుత్వ పాఠశాలలు 100% ఫలితాలు సాధించాయి. రాష్ట్రంలో 106 కొత్త ఉపాధ్యాయ పోస్టులు భర్తీ చేశారు. డి.ఎస్.సి 2008 అభ్యర్థుల్లో 1,382 మందికి కాంట్రాక్ట్ టీచర్లుగా అవకాశం కల్పించారు. దశాబ్ద కాలం తర్వాత 1,282 మంది టీచర్లకు 5 రోజుల ప్రత్యేక శిక్షణ ఇచ్చారు. జూన్ 2024లో 34,706 మంది టీచర్లకు బదిలీలు, 25,950 మందికి పదోన్నతులు అందించారు.

నేషనల్ అచీవ్మెంట్ సర్వే ప్రకారం తెలంగాణ 3వ తరగతి విభాగంలో 38 నుంచి 26వ ర్యాంకుకు, 8వ తరగతి విభాగంలో 26 నుంచి 17వ ర్యాంకుకు మెరుగుపడింది. బాలికల విద్య కోసం 120 కస్తూర్బా గాంధీ బాలిక విద్యాలయాలను ఇంటర్మీడియట్ స్థాయికి అప్‌గ్రేడ్ చేశారు; 93 పాఠశాలలను యంగ్ ఇండియా ఇన్‌స్టిట్యూట్ ఆఫ్ ఎక్సలెన్స్‌గా మారుస్తూ ప్రవేశ పరీక్షలకు ప్రత్యేక శిక్షణ ఇస్తున్నారు.