కాళేశ్వరం బ్యారేజీల నిర్వహణ: కేంద్రానికి సమగ్ర నివేదిక పంపనున్న తెలంగాణ ప్రభుత్వం

తెలంగాణ నీటిపారుదల శాఖ మంత్రి ఉత్తమ్ కుమార్ రెడ్డి కాళేశ్వరం ఎత్తిపోతల పథకం బ్యారేజీల భవిష్యత్తు నిర్వహణపై కేంద్ర ప్రభుత్వానికి సమగ్ర నివేదిక పంపాలని అధికారులను ఆదేశించారు. మంత్రి అధ్యక్షతన జరిగిన ఉన్నతస్థాయి సమీక్ష సమావేశంలో ఈ నిర్ణయం తీసుకున్నారు.

మేడిగడ్డ, అన్నారం, సుందిళ్ళ బ్యారేజీలను ప్రస్తుతం ఫ్రీ ఫ్లో విధానంలోనే నిర్వహిస్తున్నట్లు మంత్రి స్పష్టం చేశారు. భవిష్యత్తులో నీటి నిల్వ, పంపింగ్ కార్యకలాపాలు ప్రారంభించాలా వద్దా అనే విషయాన్ని కేవలం రాజకీయ ఒత్తిళ్లతో కాకుండా, అర్హత కలిగిన సాంకేతిక సంస్థల లిఖితపూర్వక సిఫారసుల ఆధారంగానే నిర్ణయిస్తామని తెలిపారు.

సమావేశంలో అన్నారం బ్యారేజీ ఫౌండేషన్లో ఖాళీలు (క్యావిటీస్) ఉన్నట్లు సాంకేతిక నిపుణులు గుర్తించారని అధికారులు తెలిపారు. ప్రస్తుత పరిస్థితుల్లో నీటి నిల్వ సురక్షితం కాదని హెచ్చరించారు. తాత్కాలిక పంపింగ్ ప్రయత్నాలు నిర్మాణ సమస్యలను మరింత తీవ్రతరం చేసే ప్రమాదం ఉందని అధికారులు సూచించారు. ప్రజా భద్రత, నిర్మాణాల స్థిరత్వంపై ఎలాంటి రాజీ ఉండదని మంత్రి స్పష్టం చేశారు.

ఈ నేపథ్యంలో మేడిగడ్డ పునరుద్ధరణ కాన్సెప్ట్ డిజైన్‌ను ఆగస్టు చివరికి, ప్రాథమిక వ్యయ అంచనాలను సెప్టెంబర్ మధ్యలోపు సిద్ధం చేయాలని నిర్ణయించారు. అన్నారం, సుందిళ్ళ బ్యారేజీలపై అదనపు సాంకేతిక విశ్లేషణ నివేదిక రెండు వారాల్లో రూపొందించాలి. అన్ని నివేదికలను సాంకేతిక సమీక్ష కమిటీకి పంపి, కేంద్ర జలశక్తి మంత్రిత్వ శాఖకు సమగ్ర లేఖ పంపాలని మంత్రి ఆదేశించారు. జీపీఆర్ పరీక్షల ఫలితాలు, సీడబ్ల్యూసీ నివేదికలు, ఫోటోలతో సహా అన్ని సాంకేతిక ఆధారాలను జత చేయాలన్నారు.

ఇదే సమావేశంలో పాలమూరు-రంగారెడ్డి ఎత్తిపోతల పథకం పురోగతిపై కూడా సమీక్షించారు. నీటి కేటాయింపులు ట్రిబ్యునల్‌లో పెండింగ్‌లో ఉండడంతో టీపీఆర్ ప్రాసెసింగ్ నిలిచిందని అధికారులు తెలిపారు. కాళేశ్వరం బ్యారేజీల బయట కనిపిస్తున్న పరిస్థితుల ఆధారంగా కాకుండా, పూర్తి అధికారిక రికార్డు, కేంద్ర అభిప్రాయం ఆధారంగానే తదుపరి నిర్ణయం తీసుకుంటామని మంత్రి స్పష్టం చేశారు.