ఏపీ-తెలంగాణ మధ్య సింగిల్ పర్మిట్ అమలుకు తెలంగాణ లారీ ఓనర్స్ డిమాండ్

తెలంగాణ లారీ ఓనర్స్ అసోసియేషన్ ఆంధ్రప్రదేశ్-తెలంగాణ మధ్య గూడ్స్ వాహనాల రాకపోకలకు సింగిల్ పర్మిట్ విధానాన్ని తిరిగి అమలు చేయాలని డిమాండ్ చేసింది. ఈ మేరకు ఏపీ ముఖ్యమంత్రి చంద్రబాబు నాయుడికి లేఖ రాసింది. రాష్ట్ర విభజనకు ముందు ఉన్న కౌంటర్ సిగ్నేచర్ పర్మిట్ విధానాన్ని పునరుద్ధరించాలని కోరింది.

రాష్ట్ర విభజన తర్వాత ఈ విధానం నిలిచిపోవడంతో ఇరు రాష్ట్రాల మధ్య సరుకు రవాణాకు అదనపు అనుమతులు, వ్యయభారం, సమయ నష్టం ఎదురవుతున్నాయని అసోసియేషన్ తెలిపింది. ఏపీలోకి లారీ వెళితే ₹1,500 జరిమానా విధిస్తున్నట్లు డ్రైవర్లు చెబుతున్నారు. దీంతో రవాణా వ్యవస్థ సులభతరం చేసేందుకు సింగిల్ పర్మిట్ తప్పనిసరని వారు వాదిస్తున్నారు.

ఈ విషయంపై తెలంగాణ రవాణ శాఖ అధికారులు సానుకూలంగా స్పందించారు. రవాణ శాఖ విజిలెన్స్ జేసీ చంద్రశేఖర్ గౌడ్, అడ్మినిస్ట్రేషన్ జేసీ శివలింగయ్య, అదనపు రవాణ కమిషనర్ రమేష్ సమస్య పరిష్కారానికి హామీ ఇచ్చినట్లు అసోసియేషన్ తెలిపింది. రెండు రాష్ట్ర ప్రభుత్వాలు కలిసి నిర్ణయం తీసుకోవాలని అధికారులు చెప్పారు.

గతంలో టీడీపీ ప్రభుత్వ హయాంలో ₹8,000 ఫీజుతో సింగిల్ పర్మిట్ అమలుకు ఇరు రాష్ట్రాల రవాణ శాఖల మధ్య ఒప్పందం కుదిరినా అమలు కాలేదని అసోసియేషన్ గుర్తు చేసింది. తెలంగాణలో లక్షకు పైగా లారీలు ఉండగా, వాటిలో 80 శాతం రాష్ట్ర పర్మిట్ ఉన్నవే. నేషనల్ పర్మిట్ 12 ఏళ్లు దాటిన వాహనాలకే ఇస్తారు. ఏపీ వాహనాలు నేషనల్ పర్మిట్ కలిగి ఉన్నా, తెలంగాణ వాహనాలకు అది లేకపోవడంతో బోర్డర్ పర్మిట్ ఫీజు భారంగా మారింది.

కౌంటర్ సిగ్నేచర్ పర్మిట్ అమల్లోకి వస్తే 5,000 నుంచి 10,000 మంది డ్రైవర్లకు ప్రయోజనం కలిగే అవకాశముందని అసోసియేషన్ పేర్కొంది. రవాణా వ్యవస్థ మెరుగయితే వస్తువుల ధరల నియంత్రణకు కూడా తోడ్పడుతుందని తెలిపింది. ఈ అంశంపై రెండు ప్రభుత్వాలు త్వరగా నిర్ణయం తీసుకోవాలని డిమాండ్ చేస్తున్నారు.