తెలంగాణ: మైనర్లు వాహనాలు నడిపితే రిజిస్ట్రేషన్ రద్దు, లైసెన్స్ 25 ఏళ్ల దాకా నిలిపివేత

తెలంగాణ రవాణా శాఖ మైనర్లు వాహనాలు నడపడాన్ని నిరోధించడానికి కఠిన చర్యలు చేపట్టింది. మైనర్లకు వాహనాలు ఇస్తే వాహన యజమానిపై, మైనర్‌పై కఠిన శిక్షలతో పాటు వాహనం రిజిస్ట్రేషన్ కూడా రద్దు చేస్తామని హెచ్చరించింది.

మోటార్ వాహనాల చట్టంలోని సెక్షన్ 199 ప్రకారం, మైనర్ వాహనం నడిపినందుకు 12 నెలల పాటు ఆ వాహనం రిజిస్ట్రేషన్ రద్దు అవుతుంది. ఇప్పటికే ఈ నిబంధన కింద 4,070 వాహనాల రిజిస్ట్రేషన్లను రద్దు చేసినట్లు రవాణా శాఖ అధికారులు తెలిపారు.

అంతేకాకుండా, నిబంధనలు ఉల్లంఘించిన మైనర్‌కు 25 ఏళ్ల వయసు వచ్చే వరకు డ్రైవింగ్ లైసెన్స్ ఇవ్వబోమని రవాణా శాఖ స్పష్టం చేసింది. మోటార్ వాహనాల చట్టం ప్రకారం 18 ఏళ్లు నిండిన వారికి మాత్రమే వాహనం నడపడానికి అర్హత ఉంటుంది.

పిల్లల భద్రత, ప్రజల భద్రత దృష్ట్యా మైనర్లకు వాహనాలు ఇవ్వొద్దని తల్లిదండ్రులకు అధికారులు విజ్ఞప్తి చేశారు. నిబంధనలు ఉల్లంఘిస్తే వాహన రిజిస్ట్రేషన్ కోల్పోవడమే కాకుండా, చట్టపరమైన చర్యలు కూడా ఎదుర్కోవాల్సి వస్తుందని హెచ్చరించారు.