హైదరాబాద్ పాలనకు తెలంగాణ కోర్ అర్బన్ రీజియన్ బిల్లు 2026 ముసాయిదా విడుదల

తెలంగాణ ప్రభుత్వం హైదరాబాద్ నగర పాలన కోసం కొత్త బిల్లును రూపొందించింది. తెలంగాణ కోర్ అర్బన్ రీజియన్ (CURE) బిల్లు 2026 ముసాయిదాను ప్రభుత్వం ఇటీవల విడుదల చేసింది. ఈ బిల్లు ప్రకారం, గ్రేటర్ హైదరాబాద్ మున్సిపల్ కార్పొరేషన్ (GHMC), సైబరాబాద్, మల్కాజగిరి కార్పొరేషన్లకు ఒకే పాలనా చట్టం వర్తిస్తుంది.

70 సంవత్సరాల కిందటి హైదరాబాద్ మున్సిపల్ కార్పొరేషన్ చట్టం 1955 స్థానంలో ఈ కొత్త చట్టం తీసుకురానున్నారు. నాటి నుండి నగరం జనాభా 1.30 కోట్లకు పెరిగింది. GHMC గా మారిన తర్వాత కూడా పాత చట్టమే కొనసాగుతోంది. ప్రస్తుతం GHMC చట్టంలోని పాలక మండలి, స్టాండింగ్ కమిటీలు, వార్డు కమిటీలు, ఎన్నికల నిర్వహణ, రుణాల సేకరణ వంటి అంశాలు యథాతథంగా కొనసాగుతాయి.

కొత్త బిల్లులో పలు కీలక మార్పులు ఉన్నాయి. ఆస్తి పన్ను విధానంలో వార్షిక అద్దె విలువకు బదులు మూలధన విలువ ఆధారంగా పన్ను విధిస్తారు. సబ్ రిజిస్ట్రార్ మార్కెట్ రేట్ల ప్రకారం పన్ను నిర్ణయిస్తారు. ప్రతి ఆస్తికి ప్రత్యేక గుర్తింపు కోడ్ ఇవ్వడంతో పాటు సెల్ఫ్ అసెస్మెంట్ సౌకర్యం కల్పిస్తారు. సమయానికి పన్ను చెల్లించే వారికి రాయితీలు ఉంటాయి. పెంపుడు కుక్కల యజమానుల నుండి వసూలు చేసే ఫీజు రద్దు చేశారు. అన్ని రకాల వ్యాపారాలకు ఒకే ట్రేడ్ లైసెన్స్ ఇవ్వాలని నిర్ణయించారు.

నూతన చట్టం ప్రకారం భవన నిర్మాణాలకు డీమ్డ్ అప్రూవల్ సౌకర్యం కల్పిస్తారు. నైట్ ఎకానమీకి ప్రత్యేక విధానం ఏర్పాటు చేసి 24 గంటలు వ్యాపారాలు జరిపే అవకాశం కల్పిస్తారు. ప్రజారోగ్యం, పారిశుద్ధ్యం పై ప్రత్యేక దృష్టి పెడతారు. మాన్యువల్ స్కావెంజింగ్ నిర్మూలనకు చర్యలు తీసుకుంటారు. నీటి సరఫరా, మురుగునీటి నిర్వహణ పూర్తి బాధ్యత వాటర్ బోర్డుకు అప్పగిస్తారు. నగరంలోని చెరువులు, నాలాలు, ప్రభుత్వ భూముల సంరక్షణ హైడ్రా సంస్థకు అప్పగించనున్నారు.

మూడు కార్పొరేషన్ల మధ్య సమన్వయం కోసం ముఖ్యమంత్రి అధ్యక్షతన CURE అపెక్స్ గవర్నెన్స్ కౌన్సిల్ ఏర్పాటు చేస్తారు. విపత్తు నిర్వహణ, ట్రాఫిక్, వాతావరణ మార్పులు, ఆహారభద్రత, వారసత్వ ఆస్తుల పరిరక్షణ వంటి అంశాలకు ప్రత్యేక సంస్థలు ఏర్పాటు చేయనున్నారు. అత్యవసర సమన్వయం కోసం స్మార్ట్ గవర్నెన్స్ సెంటర్, ఇంటిగ్రేటెడ్ డిజిటల్ పోర్టల్, ఒకే యుటిలిటీ బిల్లు చెల్లింపు వంటి సౌకర్యాలు అందుబాటులోకి వస్తాయి.

ప్రస్తుతం ప్రభుత్వం ఈ ముసాయిదా బిల్లుపై ప్రజాభిప్రాయాన్ని సేకరిస్తోంది. ప్రజల నుండి వచ్చే సూచనల మేరకు మార్పులు చేసేందుకు సిద్ధంగా ఉన్నట్లు ప్రభుత్వం తెలిపింది.