తెలంగాణ SIR గణాంకాలు విడుదల: 12,204 మంది ఓటర్ల పేర్లు తొలగింపు

తెలంగాణలో ప్రత్యేక సంక్షిప్త పునర్విమర్శ (SIR) ప్రక్రియలో భాగంగా ఎన్నికల సంఘం గణాంకాలను విడుదల చేసింది. ఫారం 7 కింద 24,323 దరఖాస్తులు వచ్చాయి. పరిశీలన అనంతరం 12,204 మంది ఓటర్ల పేర్లను ఓటర్ల జాబితా నుంచి తొలగించారు.

కొత్త ఓటర్ల నమోదుకు సంబంధించి ఫారం 6 కింద 4,88,417 దరఖాస్తులు అందాయి. వీటిపై చర్య తీసుకున్న అధికారులు 51,821 ఓటర్ల రికార్డులను అప్డేట్ చేశారు. విదేశాల్లో ఉన్న భారతీయ ఓటర్ల నమోదు కోసం ఫారం 6A కింద 6,270 దరఖాస్తులు వచ్చాయి. వాటిలో 118 రికార్డులను అప్డేట్ చేశారు.

ఓటర్ల వివరాల మార్పులు, చిరునామా సవరణల కోసం ఉపయోగించే ఫారం 8 కింద 5,05,159 దరఖాస్తులు వచ్చాయి. వీటిలో పరిశీలన తర్వాత 2,27,721 రికార్డులను అప్డేట్ చేశారు. కొత్త ఓటర్ల నమోదు, పేర్ల తొలగింపు రెండింటిలోనూ హైదరాబాద్ జిల్లా ముందంజలో నిలిచింది. హైదరాబాద్‌లో 94,204 ఫారం 6 దరఖాస్తులు వచ్చాయి. ఫారం 7 కింద 6,335 దరఖాస్తులు అందగా, 206 మంది ఓటర్ల పేర్లను తొలగించారు.

ఈ గణాంకాల ప్రకారం ప్రతి దరఖాస్తును ఆమోదించకుండా నిబంధనల ప్రకారం పరిశీలన జరిగినట్లు అధికారులు తెలిపారు. దరఖాస్తుల పరిశీలన, అభ్యంతరాల పరిష్కారం పూర్తయ్యాక తుది ఓటర్ల జాబితాను ఎన్నికల సంఘం ప్రకటించనుంది.