TG-20 లీగ్ విజయానికి ఆటగాళ్లే కారణం: HCA చైర్మన్ ఆగంరావు

హైదరాబాద్ క్రికెట్ అసోసియేషన్ (HCA) నిర్వహిస్తున్న TG-20 లీగ్ తొలి సీజన్‌కు మంచి స్పందన లభించింది. లీగ్ విజయానికి ఆటగాళ్ల ప్రదర్శన, అభిమానుల మద్దతు ప్రధాన కారణాలని HCA గవర్నింగ్ కౌన్సిల్ చైర్మన్ ఆగంరావు తెలిపారు.

ఈ నెల 12న జరిగే ఫైనల్ మ్యాచ్ కోసం స్టేడియం ఇప్పటికే సోల్డ్ అవుట్ అయింది. 30,000 మంది ప్రేక్షకుల సమక్షంలో ఫైనల్ ఘనంగా జరగనుంది. మ్యాచ్ రాత్రి 7:15కి ప్రారంభమైనా, సాయంత్రం 5:30 నుంచే రకరకాల సాంస్కృతిక కార్యక్రమాలు ప్రారంభమవుతాయని ఆగంరావు వెల్లడించారు.

టోర్నమెంట్ ద్వారా స్థానిక క్రికెటర్లకు పెద్ద వేదిక లభించిందని, 158 మంది ఆటగాళ్లకు ఇప్పటివరకు స్టేట్ లెవెల్‌లో కూడా అవకాశం రాలేదని ఆయన పేర్కొన్నారు. 16 ఏళ్ల వేది రెడ్డి సెకండ్ హయ్యస్ట్ వికెట్ టేకర్‌గా నిలవడం లీగ్ లో వెలుగులోకి వచ్చిన యువ టాలెంట్‌కు ఉదాహరణ అని చెప్పారు. ఐపీఎల్ ఫ్రాంచైజీల స్కౌట్లు ప్రతిరోజు మ్యాచ్‌లను వీక్షిస్తున్నారని, కొంతమంది ఆటగాళ్లను ఎంపిక చేయడానికి లిస్ట్ తయారు చేస్తున్నారని ఆయన సమాచారం ఇచ్చారు.

తక్కువ సమయంలో లీగ్‌ను ప్రారంభించినప్పటికీ ఊహించని స్పందన వచ్చిందని ఆగంరావు సంతోషం వ్యక్తం చేశారు. వచ్చే ఏడాది మరిన్ని మెరుగైన సౌకర్యాలు, ఎంటర్‌టైన్‌మెంట్ కార్యక్రమాలతో లీగ్‌ను నిర్వహిస్తామని హామీ ఇచ్చారు. 30 కోట్ల మంది ఈ లీగ్ మ్యాచ్‌లను టీవీ, డిజిటల్ ప్లాట్‌ఫామ్‌ల ద్వారా వీక్షించినట్లు లెక్కలు చెబుతున్నాయని తెలిపారు. టోర్నమెంట్‌లో తిలక్ వర్మ, మహ్మద్ సిరాజ్ వంటి స్టార్ ప్లేయర్లు కూడా పాల్గొన్నారు.