TGSPDCL డిజిటల్ మ్యాపింగ్: ప్రతి ఇంటికి విద్యుత్ సరఫరా ట్రాకింగ్

TGSPDCL రాష్ట్రంలో విద్యుత్ సరఫరా వ్యవస్థను పూర్తిగా డిజిటల్ రూపంలోకి మార్చడానికి నెట్‌వర్క్ మ్యాపింగ్ డ్రైవ్ ప్రారంభించింది.

తొలి దశలో కోర్ అర్బన్ రీజియన్ ఎకానమీ (CURE) పరిధిలో ఈ ప్రాజెక్టును అమలు చేశారు. 33kV ఫీడర్లు, 11kV ఫీడర్లు, డిస్ట్రిబ్యూషన్ ట్రాన్స్‌ఫార్మర్లు (DTR), సర్వీస్ కనెక్షన్ల మధ్య కనెక్టివిటీ వివరాలను ఒకే వేదికపై నమోదు చేస్తున్నారు. HGSPDCL CMD జితేష్ పటేల్ మాట్లాడుతూ, జూన్‌లో 'పోల్స్ అండ్ లైన్స్' స్పెషల్ డ్రైవ్, 'వాక్ ద లైన్' కార్యక్రమం నిర్వహించామని, జూలై నెలాఖరుకు DTR మ్యాపింగ్, కన్స్యూమర్-టు-ట్రాన్స్‌ఫార్మర్ లింకేజీ పూర్తి చేస్తామని తెలిపారు.

ఈ నెల నుంచి ప్రతి విద్యుత్ బిల్ ఇచ్చేటప్పుడు వినియోగదారుడు ఏ ట్రాన్స్‌ఫార్మర్‌పై లింక్ అయ్యాడో సిస్టమ్‌లో ఎంట్రీ చేస్తారు. ఇది ఓవర్‌లోడ్ ఉన్న ట్రాన్స్‌ఫార్మర్ల గుర్తింపుకు, అంతరాయాలు ఏర్పడిన వెంటనే పునరుద్ధరణకు దోహదపడుతుందని అధికారులు వివరించారు.

1912 కాల్ సెంటర్, వాట్సాప్, వెబ్‌పోర్టల్ ద్వారా ఫిర్యాదు వచ్చిన వెంటనే సర్వీస్ ఫీడర్, DTR వివరాలు సిస్టమ్ స్వయంగా గుర్తించి సమస్యను వేగంగా పరిష్కరించడానికి వీలవుతుంది. భవిష్యత్తులో స్మార్ట్ గ్రిడ్, AI ఆధారిత అవుటేజ్ మేనేజ్‌మెంట్ వంటి టెక్నాలజీలకు ఈ మ్యాపింగ్ బలమైన పునాది అవుతుందని జితేష్ పటేల్ చెప్పారు.