తెలంగాణ ఆర్టీసీ సంఘం గుర్తింపు ఎన్నికల పోలింగ్ ప్రారంభం

తెలంగాణ ఆర్టీసీ (TGSRTC) సంఘం గుర్తింపు ఎన్నికల పోలింగ్ ఉదయం 5 గంటలకు ప్రారంభమైంది. ఈ పోలింగ్ సాయంత్రం 6 గంటల వరకు కొనసాగుతుంది.

ఈ ఎన్నికల్లో మొత్తం 12 సంఘాలు పోటీలో ఉన్నాయి. రాష్ట్రవ్యాప్తంగా దాదాపు 35 వేల మంది ఆర్టీసీ ఉద్యోగులు ఓటు వేయనున్నారు.

గ్యారేజీలు, డిపోలు, కార్యాలయాలు కలిపి 100కు పైగా యూనిట్లలో 120కు పైగా పోలింగ్ కౌంటర్లు ఏర్పాటు చేశారు. ప్రతి ఉద్యోగి రెండు ఓట్లు వేయాలి. ఒక ఓటు రాష్ట్ర గుర్తింపు సంఘానికి, మరో ఓటు స్థానిక గుర్తింపు సంఘానికి వేయాలి.

పోలింగ్ ముగిసిన తర్వాత బ్యాలెట్ బాక్సులను భద్రపరుస్తారు. పోస్టల్ బ్యాలెట్ ప్రక్రియను ఈ నెల 14, 15 తేదీల్లో నిర్వహిస్తారు. ఈ నెల 17న ఓట్ల లెక్కింపు చేపట్టి, అదే రోజు సాయంత్రం ఫలితాలు ప్రకటిస్తారు. దాదాపు 10 ఏళ్ల తర్వాత ఈ ఎన్నికలు జరుగుతున్నాయి.