థాయిలాండ్‌లో భారీ వర్షాలు: 24 గంటల్లో 340 మి.మీ వర్షపాతం

థాయిలాండ్‌లో గత 24 గంటల్లో 340 మిల్లీమీటర్ల వర్షపాతం నమోదైంది. భారీ వర్షాల కారణంగా ఉత్తర థాయిలాండ్‌లో వరదలు వచ్చాయి.

అండమాన్ సముద్రం, థాయిలాండ్ గల్ఫ్ నుంచి వీస్తున్న గాలుల ప్రభావంతో భారీ వర్షాలు కురుస్తున్నాయి. నదులు పొంగడంతో రోడ్లపై నీరు చేరింది. పార్క్ చేసిన కార్లు, లారీలు నీటి ప్రవాహంలో కొట్టుకుపోయాయి.

వందలాది ఇళ్లు పూర్తిగా నీట మునిగాయి. దీంతో చాలా మంది నిరాశ్రయులయ్యారు. పలు ప్రాంతాల్లో కొండచరియలు విరిగిపడ్డాయి. వంతెనలు కూలడంతో కొన్ని గ్రామాలు బయటి ప్రపంచానికి దూరమయ్యాయి.

చియాంగ్ మై పర్యాటక ప్రాంతంలో పర్యాటకులు సెల్ఫీలు తీసుకుంటుండగా వరద ప్రవాహం రావడంతో పలువురు గల్లంతయ్యారు. సహాయక సిబ్బంది చాలా మందిని కాపాడారు.

ప్రభుత్వం లోతట్టు ప్రాంతాల ప్రజలను అప్రమత్తం చేసింది. వారిని సురక్షిత ప్రాంతాలకు తరలిస్తోంది.