తిలకవతి: ప్రేమించిన సేనాధిపతి యుద్ధంలో మరణించినా జీవితాంతం ఒంటరిగా ఉన్న యువతి

పల్లవ రాజ్యంలో కలిపహయార్ అనే సేనాధిపతి ఉండేవాడు. అతడు కర్షక కుటుంబానికి చెందినవాడు. తిలకవతి అనే యువతిని వివాహం చేసుకోవాలని కోరుకున్నాడు. పెద్దలు సంప్రదించి సంబంధం నిశ్చయం చేశారు.

కానీ వివాహానికి ముందు ఒక యుద్ధం జరిగింది. ఆ యుద్ధంలో కలిపహయార్ పాల్గొని పరాక్రమం చూపించి జయించాడు, కానీ చివరికి అతడు మరణించాడు.

ఈ విషాదం తట్టుకోలేక తిలకవతి తండ్రి మరణించాడు. కొంత కాలం తర్వాత తల్లి కూడా మరణించింది. తిలకవతి తనను వివాహం చేసుకోని సేనాధిపతినే మనసా భర్తగా భావించి ఇక వివాహం చేసుకోనని నిశ్చయించుకుంది. తన తమ్ముడి కోసం బతికి అతన్ని చక్కగా చూసుకుంది.

తమ్ముడు సైతం అక్క చెప్పిన మార్గంలో చలివేంద్రాలు, ఉద్యానవనాలు, తటాకములు ఏర్పాటు చేయడం వంటి సేవా కార్యక్రమాలు శివార్పణ బుద్ధితో చేశాడు. అతడు అన్ని మతాల సారాన్ని తెలుసుకోవాలనే ప్రయత్నం చేశాడు.