ఏలూరు జిల్లా జీలుగుమిల్లిలో పెద్దపులి సంచారం, రైతు ఆవుపై దాడి

ఏలూరు జిల్లా జీలుగుమిల్లి మండలం జిల్లేలగూడం అటవీ ప్రాంతంలో పెద్దపులి సంచారం కొనసాగుతోంది. గత రాత్రి గ్రామానికి చెందిన రైతు వెంకటేష్‌కు చెందిన ఆవుపై పులి దాడి చేసి చంపింది.

గత రెండు రోజులుగా ఈ పులి వేలేరుపాడు మండలంలో సంచరిస్తోంది. ఈరోజు అది జీలుగుమిల్లి మండలంలోని అటవీ ప్రాంతంలోకి ప్రవేశించింది. జిల్లేలగూడం పంచాయతీ సమీపంలో ఉన్న ఆవుపై కూడా దాడి జరిగింది. దీంతో గ్రామస్థులు భయాందోళనకు గురవుతున్నారు.

పులికి ఇప్పటికే రేడియో ట్యాగింగ్ సిస్టమ్ అమర్చి ఉంది. దాని కదలికలను అటవీ శాఖ అధికారులు నిరంతరం గమనిస్తున్నారు. ఉన్నత అధికారుల సూచనల మేరకు ఈ ఫాలోఅప్ కొనసాగుతోంది. పులిని పట్టుకునేందుకు గతంలో ప్రత్యేక బృందాలు ఈ ప్రాంతంలో పనిచేశాయి.

ఆ బృందాలను మళ్లీ రంగంలోకి దించాలా, లేదా పులి తిరిగి అటవీ ప్రాంతంలోకి వెళ్లిపోతుందా అనే అంశంపై అధికారులు ఆలోచిస్తున్నారు. పులి పోలవరం ప్రాజెక్టు వైపు మైదాన ప్రాంతానికి వస్తుందన్న భయం ప్రజల్లో ఉంది.

పరిసర ప్రాంతాల ప్రజలు అప్రమత్తంగా ఉండాలని అటవీ శాఖ అధికారులు సూచించారు. ఎవరూ ఒంటరిగా బయటకు వెళ్లవద్దని ఆదేశించారు.