గోదావరి జిల్లాలో పులి సంచారం: ఉండ్రాజవరంలో ప్రజలకు అప్రమత్తత సూచన

గోదావరి జిల్లాలో మళ్లీ పులి సంచారం కలకలం రేపింది. ఉండ్రాజవరం మండలంలోని పసలపూడి, కాల్దరి గ్రామాల మధ్య రెండు రోజులుగా పులి ఆనవాళ్లు కనిపిస్తున్నాయి.

పోలీసులు, రెవెన్యూ అధికారులు ప్రజలను అప్రమత్తం చేశారు. శివారు ప్రాంతాల్లో ఉండేవారు, పొలాలకు వెళ్లే రైతులు ఒంటరిగా వెళ్లొద్దని ప్రకటనలు చేస్తున్నారు.

ఏడాదిగా గోదావరి తీర ప్రాంతాల్లో పులి సంచరిస్తున్నట్లు అధికారులు గుర్తించారు. గతంలో పట్టుకుని భద్రాచలం సమీప అడవుల్లో వదిలిన పులికి ట్రాకర్ అమర్చారు. అది మళ్లీ గోదావరి జిల్లాకు వస్తున్నట్లు సంకేతాలు ఉన్నాయి.

దీంతో అటవీ శాఖ అధికారులు పులి కదలికలపై దృష్టి పెంచారు. ఏటికట్ట ప్రాంతానికి వెళ్లేవారు, పశువులను తోలుకెళ్లేవారు జాగ్రత్తలు తీసుకోవాలని సూచించారు.