త్రికరణాలు అంటే ఏమిటి? త్రికరణ శుద్ధి అంటే తెలుసుకోండి

త్రికరణ శుద్ధి అంటే మనసు, మాట, చేత అనే మూడు సాధనాలు ఒకే విధంగా పనిచేయడం. ఈ మూడింటిని త్రికరణాలు అంటారు. ఏ పని చేయాలన్నా ముందు మనసుతో ఆలోచిస్తాం. తర్వాత నోటితో చెబుతాం. చివరగా శరీరంతో చేస్తాం.

ఉదాహరణకు అన్నం తినాలనే ఆలోచన మనసులో వస్తుంది. ఆ విషయాన్ని నోరు చెబుతుంది. చేతులు, కాళ్లు ఆ పని చేస్తాయి. ఈ మూడు సాధనాలు శుద్ధిగా ఉండడమే త్రికరణ శుద్ధి.

ఒకరిని బాగున్నావు అని నోటితో అని, మనసులో వేరే విషయం ఆలోచించడం త్రికరణ శుద్ధి కాదు. పూజలో నోటితో పుష్పం సమర్పయామి అని అంటూ చేత్తో పువ్వు వేసినా, మనసు వేరే చోట ఉంటే అది సరికాదు. పువ్వు సమర్పిస్తున్న భావన మనసులో ఉండాలి.

ఈ వివరణ ప్రకారం ఐదు నిమిషాల పూజ చాలు. ఆ ఐదు నిమిషాలూ మనసు దేవుడిపై ఉంచాలి. మనసులో భావన, నోటి మాట, చేతి పని ఒకటిగా ఉన్నప్పుడు ఫలితం పూర్తిగా ఉంటుందని చెప్పారు.