‘ఎక్కువ చమురు తీసుకుంటాం’: ఇరాక్‌తో భారీ ఒప్పందాల దిశగా అమెరికా – ట్రంప్

ఇరాక్‌తో భారీ చమురు ఒప్పందాలు జరపనున్నట్టు అమెరికా అధ్యక్షుడు డొనాల్డ్ ట్రంప్ ప్రకటించారు. ఇరాక్ నుంచి పెద్ద మొత్తంలో చమురు తీసుకోనున్నామని, ఈ ఒప్పందాల వల్ల రెండు దేశాలకు ఉద్యోగాలు లభిస్తాయని ఆయన చెప్పారు. ఇరాక్ ప్రధానమంత్రి మొహమ్మద్ షియా అల్ సుడానీతో సమావేశం అనంతరం ట్రంప్ ఈ వ్యాఖ్యలు చేశారు.

గత నాలుగైదేళ్ళలో అమెరికా–ఇరాక్ మధ్య వాణిజ్యం గణనీయంగా తగ్గిందని, కానీ ఇరాక్‌లోని అపారమైన చమురు నిల్వల వల్ల ఇప్పుడు భారీ అవకాశాలు లభిస్తాయని ట్రంప్ వివరించారు. ‘ఇరాక్‌తో కలిసి అద్భుతమైన సహకారం అందిస్తాం. ఇరాకీలు ఇతర దేశాల కంపెనీలతో వ్యాపారం చేయడానికి ఇష్టపడట్లేదు, అమెరికాతోనే ఒప్పందాలు చేసుకోవాలనుకుంటున్నారు’ అని ఆయన పేర్కొన్నారు.

చమురు ఉత్పత్తిలో ప్రధానంగా అమెరికన్ కంపెనీలు పాల్గొంటాయని, ఈ ప్రక్రియ ద్వారా లక్షలాది ఉద్యోగాలు సృష్టిస్తామని ట్రంప్ తెలిపారు. ఇరాక్ ప్రధాని ఎన్నికలో తాను బలంగా మద్దతిచ్చానని, ఆయన గొప్ప నేతగా ఎదుగుతారని తన నమ్మకమని వివరించారు.

అమెరికా–ఇరాక్ మధ్య ఈ చమురు సహకారం ఇరు దేశాల ఆర్థిక వ్యవస్థలకు ఊతమిస్తుందని, మధ్యప్రాచ్యంలో అమెరికా ప్రభావాన్ని మరింత పెంచుతుందని విశ్లేషకులు అంచనా వేస్తున్నారు.