127 హామీలు నెరవేర్చినట్లు ట్రంప్ ప్రకటన.. శ్వేతసౌధం నివేదిక విడుదల

అమెరికా మధ్యంతర ఎన్నికల ప్రచారం చివరి రోజున అధ్యక్షుడు ట్రంప్ ఒక ప్రకటన చేశారు. రెండో పదవీకాలంలో 127 హామీలను నెరవేర్చినట్లు ఆయన తెలిపారు.

ఈ మేరకు వైట్ హౌస్ 'Promises Made, Promises Kept, Results Delivered' పేరుతో నివేదిక విడుదల చేసింది. రెండోసారి అధికారంలోకి వచ్చిన తర్వాత నెరవేర్చిన 127 హామీలను ఇందులో ప్రధానంగా ప్రస్తావించారు. వాణిజ్యం, ఆర్థికం, ఇమిగ్రేషన్, జాతీయ భద్రత, ఇంధనం, విదేశాంగ విధానాల్లో తమ ప్రభుత్వం గతంలో లేని విజయాలు సాధించిందని నివేదిక పేర్కొంది. భారత్, బ్రిటన్, EU, జపాన్, చైనా, దక్షిణ కొరియా దేశాలతో కొత్త వాణిజ్య ఒప్పందాలు కుదుర్చుకున్నట్లు తెలిపింది. టారిఫ్ పాలసీని ఉపయోగించి అమెరికా తయారీ రంగాన్ని బలోపేతం చేసినట్లు శ్వేతసౌధం వివరించింది.

భారత్, అమెరికా మధ్య ఇటీవల కుదిరిన తాత్కాలిక వాణిజ్య ఒప్పందాన్ని కూడా ట్రంప్ తన విజయంగా పేర్కొన్నారు. ఈ ఒప్పందాన్ని వేగంగా అమలు చేస్తూనే పూర్తిస్థాయి వాణిజ్య ఒప్పందాన్ని ఖరారు చేసేందుకు ఇరు దేశాలు సిద్ధమవుతున్నాయని నివేదిక తెలిపింది.

ప్రపంచవ్యాప్తంగా ఎనిమిది వివాదాల్లో శాంతి స్థాపనకు ట్రంప్ కృషి చేసినట్లు శ్వేతసౌధం పేర్కొంది. ఇందులో భారత్, పాకిస్తాన్ మధ్య జరిగిన సంఘర్షణను కూడా చేర్చింది. అయితే ఆ నాలుగు రోజుల చర్చల్లో మూడో దేశం జోక్యం లేదని భారత్ స్పష్టం చేసింది.

ఇజ్రాయిల్, ఇరాన్, కాంగో, రువాండా, కంబోడియా, థాయిలాండ్, కొసావో, సెర్బియా, ఈజిప్ట్, ఇథియోపియా, ఆర్మేనియా, అజర్బైజాన్, ఇజ్రాయిల్, హమాస్ వివాదాలను కూడా నివేదిక ప్రస్తావించింది. రష్యా, ఉక్రెయిన్ యుద్ధానికి ముగింపు పలికేందుకు త్రైపాక్షిక చర్చలు జరుపుతున్నట్లు తెలిపింది.

సరిహద్దు గోడ నిర్మాణం తిరిగి ప్రారంభించడంతో అమెరికా, మెక్సికో సరిహద్దులో అక్రమ చొరబాట్లు రికార్డు స్థాయికి తగ్గాయని ట్రంప్ ప్రభుత్వం తెలిపింది. శ్రామిక కుటుంబాలకు ఇచ్చిన పన్ను మినహాయింపులతో 5 కోట్ల 30 లక్షల మంది పన్ను చెల్లింపుదారులకు ఊరట లభించిందని పేర్కొంది. సైనిక ఆధునీకరణ, దేశీయ చమురు, గ్యాస్ ఉత్పత్తి పెంపు, ఆర్టిఫిషియల్ ఇంటెలిజెన్స్, డిజిటల్ అసెట్స్ రంగాల్లో అమెరికా ఆధిపత్యాన్ని నిలబెట్టే నిర్ణయాలు తీసుకున్నట్లు నివేదిక తెలిపింది. ఈ నివేదిక అమెరికా ఓటర్లను ఏ మేరకు ఆకట్టుకుంటుందో ఎన్నికల ఫలితాల తర్వాత తేలనుంది.