డొనాల్డ్ ట్రంప్ ఇరాన్ యుద్ధాన్ని రద్దు చేయడం సరైన నిర్ణయమే: మేజర్ జనరల్ జీడీ బక్షీ

అమెరికా అధ్యక్షుడు డొనాల్డ్ ట్రంప్ ఇరాన్తో యుద్ధాన్ని రద్దు చేయడం చాలా తెలివైన నిర్ణయమని భారత సైనిక నిపుణుడు మేజర్ జనరల్ జీడీ బక్షీ అభిప్రాయపడ్డారు. గ్లోబల్ చమురు నిల్వలు కేవలం నాలుగు వారాలకు పడిపోయాయని, ఈ యుద్ధం కొనసాగితే ఆర్థిక మాంద్యం వచ్చే ప్రమాదం ఉందని చమురు నిపుణులు ట్రంప్ను హెచ్చరించినట్లు ఆయన తెలిపారు. ఆ హెచ్చరికతో ట్రంప్ యుద్ధాన్ని నిలిపివేసే నిర్ణయం తీసుకున్నారని బక్షీ చెప్పారు.

ప్రపంచ దేశాలు తమ వ్యూహాత్మక చమురు నిల్వలను వినియోగించి ధరలను నియంత్రించే ప్రయత్నం చేస్తున్నాయి. అయితే ఇప్పుడు ఆ నిల్వలు అడుగంటిన స్థితికి చేరుకోవడంతో, గల్ఫ్ ప్రాంతం మూసివేస్తే ప్రపంచ ఆర్థిక వ్యవస్థ 1928 నాటి మాంద్యం వైపు దూసుకెళ్తుందని బక్షీ హెచ్చరించారు. భారతదేశం తన చమురు అవసరాల్లో 80 శాతం దిగుమతి చేసుకుంటున్నందున, ఈ పరిస్థితి దేశ ఆర్థిక వ్యవస్థపై కూడా తీవ్ర ప్రభావం చూపుతుందని నిపుణులు అంచనా వేస్తున్నారు.

సాధారణంగా ట్రంప్ నిపుణుల సలహాలను పట్టించుకోరని, కానీ ఈసారి ఎక్సాన్ మొబైల్, చేవ్రాన్ వంటి చమురు కంపెనీల సీఈవోల హెచ్చరిక విని, యుద్ధాన్ని ఆపే నిర్ణయం తీసుకోవడం ఊరట కలిగించిందని బక్షీ అన్నారు. యుద్ధం ఆగడంతో చమురు సరఫరా కొనసాగే అవకాశం ఉన్నప్పటికీ, నిల్వల కొరత తాత్కాలికంగా పరిష్కరించాల్సిన అవసరం ఉందని చమురు మార్కెట్ విశ్లేషకులు అభిప్రాయపడుతున్నారు.