ద్రవ్యోల్బణం 6 ఏళ్ల కనిష్ఠ స్థాయికి.. టిప్స్, ఓవర్‌టైమ్, సోషల్ సెక్యూరిటీపై పన్ను ఎత్తివేత: ట్రంప్

అమెరికా అధ్యక్షుడు డొనాల్డ్ ట్రంప్ ద్రవ్యోల్బణం గత ఆరేళ్లలో ఎన్నడూ లేనంతగా ఒకే నెలలో భారీ క్షీణత నమోదు చేసిందని ప్రకటించారు. ట్రంప్ ప్రతిపాదించిన కొత్త పన్ను బిల్లులో ద్రవ్యోల్బణం తగ్గింపును ప్రస్తావిస్తూ, పలు కీలక పన్ను మినహాయింపులను వివరించారు. ఆయన మాట్లాడుతూ, "మా గొప్ప, పెద్ద, అందమైన బిల్లు" కష్టపడి పనిచేసే కుటుంబాలకు వేల డాలర్ల పొదుపు కల్పిస్తుందన్నారు.

ఈ బిల్లు ప్రకారం టిప్స్‌పై పన్ను ఉండదు, ఓవర్‌టైమ్ వేతనాలపై పన్ను ఉండదు, సీనియర్ల సోషల్ సెక్యూరిటీ పెన్షన్లపై ఎలాంటి పన్ను ఉండదు. అమెరికాలో తయారైన కారు కొనుగోలుకు తీసుకున్న రుణంపై వడ్డీ మినహాయింపు లభిస్తుంది. ఉద్యోగాలు సృష్టించే వ్యాపారాలకు 100 శాతం వ్యయ మినహాయింపు ఇవ్వనున్నామని తెలిపారు.

ట్రంప్ మాట్లాడుతూ, స్టాక్ మార్కెట్లు చరిత్రలోనే అత్యున్నత స్థాయికి చేరుకున్నాయని, 401కే, పింఛను ఖాతాలు ప్రతిరోజూ రికార్డులు సృష్టిస్తున్నాయని పేర్కొన్నారు. గతంలో అమెరికా ప్రపంచంలోనే అత్యధిక ప్రిస్క్రిప్షన్ డ్రగ్స్ ధరలు చెల్లించేదని, తన మోస్ట్ ఫేవర్డ్ నేషన్స్ పాలసీతో ఇప్పుడు అత్యల్ప ధరలు చెల్లిస్తున్నామని చెప్పారు. ఫార్మా కంపెనీలను బాధ్యతాయుతంగా వ్యవహరించేలా చేశామని ఆయన వివరించారు.

ట్రంప్ ప్రతిపాదించిన ఈ పన్ను మినహాయింపుల బిల్లు అమెరికా కాంగ్రెస్ ఆమోదం పొందాల్సి ఉంది.