అక్టోబర్‌కు TTD ఆన్‌లైన్ సేవా టికెట్ల కోటా విడుదల తేదీలు ప్రకటించిన దేవస్థానం

అక్టోబర్ నెలకు సంబంధించి తిరుమల తిరుపతి దేవస్థానం (TTD) సేవా టికెట్లు, దర్శన్ టోకెన్లు, గదుల కోటా విడుదల షెడ్యూల్‌ను ప్రకటించింది.

శ్రీవారి ఆర్జిత సేవలైన సుప్రభాతం, తోమాల, అర్చన, అష్టోత్తర శతనామావళి, పాద పద్మారాధన సేవా టికెట్ల కోటాను ఈ నెల 18వ తేదీ ఉదయం 10 గంటలకు TTD వెబ్‌సైట్‌లో విడుదల చేస్తారు. ఈ సేవా టికెట్ల కోసం ఎలక్ట్రానిక్ డిప్ నమోదు 20వ తేదీ ఉదయం 10 గంటల వరకు ఆన్‌లైన్‌లో చేసుకోవచ్చు. అనంతరం 20 నుంచి 22వ తేదీ మధ్యాహ్నం 12 గంటల లోపు చెల్లింపు పూర్తి చేసిన భక్తులకు టికెట్లు మంజూరవుతాయి.

కళ్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్రదీపాలంకార సేవ వంటి మిగిలిన ఆర్జిత సేవల టికెట్లు 21న ఉదయం 10 గంటలకు విడుదల కానున్నాయి. అదే రోజు మధ్యాహ్నం 3 గంటలకు వర్చువల్ సేవల దర్శన స్లాట్ల కోటా విడుదల అవుతుంది.

అంగప్రదక్షిణ టోకెన్ల కోటా 23న ఉదయం 10 గంటలకు, శ్రీవాణి ట్రస్ట్ దర్శన టోకెన్లు అదే రోజు 11 గంటలకు, దివ్యాంగులు, వయోవృద్ధులు, దీర్ఘకాలిక రోగుల కోసం ఉచిత ప్రత్యేక దర్శనం టోకెన్లు మధ్యాహ్నం 3 గంటలకు విడుదల చేస్తారు.

రూ.300 ప్రత్యేక ప్రవేశ దర్శన టికెట్ల కోటా 24న ఉదయం 10 గంటలకు, తిరుమలలోని గదుల కోటా అదే రోజు మధ్యాహ్నం 3 గంటలకు TTD వెబ్‌సైట్‌లో అందుబాటులోకి వస్తాయి. భక్తులు TTD అధికారిక వెబ్‌సైట్ ద్వారానే టికెట్లు బుక్ చేసుకోవాలని దేవస్థానం సూచించింది.