ఆయిల్ పామ్ సాగు విస్తరణపై మంత్రి తుమ్మల సమీక్ష; ప్రాసెసింగ్ ప్లాంట్, ప్యాకింగ్ స్టేషన్లపై ఆదేశాలు

హైదరాబాద్ బషీర్బాగ్ లోని స్టేట్ ఆయిల్ ఫెడ్ కార్యాలయంలో వ్యవసాయ శాఖ మంత్రి తుమ్మల నాగేశ్వరరావు సోమవారం ఆయిల్ పామ్ సాగు విస్తరణ, నర్సరీ నిర్వహణ, మొక్కల లభ్యత, రైతు సేవలు, డ్రిప్ ఇరిగేషన్ అమలు, భవిష్యత్ కార్యాచరణపై ఉన్నత స్థాయి సమీక్ష నిర్వహించారు. రైతుల ప్రయోజనాల విషయంలో అధికారులు బాధ్యతాయుతంగా వ్యవహరించాలని ఆయన సూచించారు.

ప్రస్తుతం ఆయిల్ పామ్ గెలల ధరలు మంచి స్థాయిలో ఉండడంతో చాలా మంది రైతులు ఈ సాగుకు ఆసక్తి చూపుతున్నారని మంత్రి తెలిపారు. రైతులకు ప్రత్యక్షంగా లబ్ధి చేకూర్చే పంటలపై ప్రత్యేక దృష్టి సారించాలని అన్నారు.

ఖమ్మం జిల్లా కల్లూరు గూడెంలో నిర్మాణంలో ఉన్న ఆయిల్ పామ్ ప్రాసెసింగ్ ప్లాంట్ పనులను గడువులోగా పూర్తి చేయాలని, అలాగే టీజీ ఆయిల్ ఫెడ్ ఆధ్వర్యంలో ఆధునిక సాంకేతికతతో ఏర్పాటవుతున్న మెగా ఆయిల్ ప్యాకింగ్ స్టేషన్ ప్రారంభోత్సవ ఏర్పాట్లను వేగవంతం చేయాలని అధికారులను ఆదేశించారు.

విజయ హైదరాబాద్ బ్రాండ్ వంట నూనెల విక్రయాలు పెంపొందించేందుకు మార్కెటింగ్ విస్తరణ, విస్తృత ప్రచార కార్యక్రమాలు, ప్రోత్సాహక చర్యలు చేపట్టాలని మంత్రి సూచించారు.