తమిళనాడులో CM విజయ్ కీలక నిర్ణయం: డీఎంకే హయాంలో టెంపుల్ ఫండ్స్‌తో రూ.246 కోట్ల ప్రాజెక్టులు రద్దు

తమిళనాడులో టీవీకే ప్రభుత్వం సీఎం విజయ్ పుట్టినరోజు సందర్భంగా కీలక నిర్ణయం తీసుకుంది. డీఎంకే హయాంలో టెంపుల్ ఫండ్స్‌తో మంజూరైన 46 ప్రాజెక్టులకు అనుమతి రద్దు చేస్తూ ఉత్తర్వులు జారీ చేసింది. ఈ ప్రాజెక్టుల మొత్తం విలువ రూ.246 కోట్లు. ఆలయాలకు చెందిన నిధులను మతపరమైన అవసరాలకు మాత్రమే వినియోగించాలని, వాణిజ్య ప్రయోజనాల కోసం ఖర్చు పెట్టవద్దని ప్రభుత్వం స్పష్టం చేసింది.

రద్దు చేసిన ప్రాజెక్టుల్లో 29 వివాహ మండప నిర్మాణాలు (రూ.115.77 కోట్లు), 17 వాణిజ్య సముదాయ నిర్మాణాలు (రూ.130.08 కోట్లు) ఉన్నాయి. కోర్టు ఆదేశాలు, ఆలయాలపై ఆర్థిక భారం కారణంగా ఈ ప్రాజెక్టులకు పరిపాలక అనుమతిని ఉపసంహరించినట్లు టీవీకే ప్రభుత్వం తెలిపింది. డీఎంకే హయాంలో హిందూ ధార్మిక దేవాదాయ శాఖ (HR&CE) బోర్డు నిర్వహణలోని పెద్ద ఆలయాల నిధులను లాభాపేక్షకు వాడే విధానాన్ని ఇప్పుడు రద్దు చేసింది.

బీజేపీ నేత నారాయణన్ తిరుపతి ఈ నిర్ణయాన్ని స్వాగతిస్తూ, డీఎంకే హయాంలో ఆలయ నిధులు దుర్వినియోగం జరిగాయని, ఇది చట్టవిరుద్ధమని ఆరోపించారు. ఆలయ నిధులు సంబంధిత దేవాలయాల అభివృద్ధికి మాత్రమే ఖర్చు కావాలని, ప్రభుత్వానికి వాటిపై ఎలాంటి జోక్యం ఉండకూడదని స్పష్టం చేశారు. సుప్రీంకోర్టు తీర్పు ప్రకారం దేవుడే ఆలయానికి యజమాని అన్నారు. టెంపుల్ ఫండ్స్‌ను వ్యాపార ప్రయోజనాల కోసం వాడకుండా పవిత్రమైన కార్యాలకు మాత్రమే ఖర్చు చేయాలనే విధానాన్ని టీవీకే ప్రభుత్వం ఖరారు చేసింది. డీఎంకే హయాంలో టెంపుల్ ఫండ్స్‌తో కల్యాణ మంటపాలు, వాణిజ్య భవనాలు నిర్మించే పథకాన్ని పూర్తిగా రద్దు చేయడం స్టాలిన్ విధానాల నుంచి పూర్తి మలుపుగా కనిపిస్తోంది.