పోలీస్ కానిస్టేబుల్ నియామకాలు: 5,000 కాదు, 20,000 పోస్టుల నోటిఫికేషన్ ఇవ్వాలని నిరుద్యోగుల డిమాండ్

హైదరాబాద్: పోలీస్ కానిస్టేబుల్ పోస్టుల నియామకానికి తెలంగాణ ప్రభుత్వం కేవలం 5,000 పోస్టుల నోటిఫికేషన్ విడుదల చేయడంపై నిరుద్యోగులు ఆందోళన వ్యక్తం చేస్తున్నారు. రాష్ట్రంలో 20,000 పోలీస్ కానిస్టేబుల్ ఖాళీలు ఉన్నాయని, వాటిని ఒకేసారి భర్తీ చేయాలని వారు డిమాండ్ చేస్తున్నారు.

45 రోజులుగా దిల్షుక్‌నగర్, అశోక్ నగర్, చిక్కడపల్లి తదితర ప్రాంతాల్లో నిరుద్యోగ యువకులు నిరసన ప్రదర్శనలు చేపట్టారు. వయోపరిమితి సడలింపు, జీఓ 46 రద్దు వంటి డిమాండ్లను కూడా వారు తెరపైకి తెచ్చారు.

ముఖ్యమంత్రి రేవంత్ రెడ్డి ఇటీవల ఓ కార్యక్రమంలో మాట్లాడుతూ ప్రభుత్వం ఇప్పటికే 70,000 ఉద్యోగాలు భర్తీ చేసిందని, పోలీస్ కానిస్టేబుల్‌ కేవలం 5,000 పోస్టులకు నోటిఫికేషన్ ఇస్తామని చెప్పారు. నిరుద్యోగులు మాత్రం గత నాలుగేళ్లుగా పోలీస్ ఉద్యోగ నోటిఫికేషన్ రాలేదని, వయోపరిమితి లోపం వల్ల తాము నష్టపోతున్నామని పేర్కొంటున్నారు.

5,000 పోస్టుల నోటిఫికేషన్ వల్ల హైదరాబాద్, రంగారెడ్డి కమిషనరేట్ల పరిధిలోనే ఎక్కువ నియామకాలు జరుగుతాయని, మిగతా జిల్లాలకు కొద్దిపాటి పోస్టులు మాత్రమే వచ్చే పరిస్థితి ఉంటుందని నిరుద్యోగులు ఆందోళన వ్యక్తం చేస్తున్నారు. తమ డిమాండ్లను వెంటనే పరిష్కరించకపోతే ఆందోళన తీవ్రతరం చేస్తామని, సచివాలయాన్ని ముట్టడించేందుకు వెనుకాడబోమని నిరుద్యోగ నాయకులు హెచ్చరించారు.

ఈ విషయంపై తెలంగాణ ప్రభుత్వం నుండి స్పందన తెలియాల్సి ఉంది.