ఇజ్రాయెల్ సెట్లర్లు తనను నిర్బంధించారని US కాంగ్రెస్‌మెన్ రో ఖన్నా ఆరోపణ

అమెరికా డెమొక్రటిక్ పార్టీ కాంగ్రెస్ సభ్యుడు రో ఖన్నా వెస్ట్ బ్యాంక్ పర్యటనలో తనకు ఎదురైన అనుభవాన్ని బయటపెట్టారు. ఇజ్రాయెల్ సెట్లర్లు తనను నిర్బంధించారని, ఐడీఎఫ్ సైన్యం కూడా వారికే మద్దతు ఇచ్చిందని ఆయన ఆరోపించారు. ఇజ్రాయెల్-పాలస్తీనా సంఘర్షణ నేపథ్యంలో ఈ ఘటన చోటు చేసుకుంది.

ఖన్నా మాట్లాడుతూ, వెస్ట్ బ్యాంక్‌లో ఓ గ్రామంలో ఇజ్రాయెల్ సెట్లర్లు స్కూల్‌తో సహా అన్నింటినీ ధ్వంసం చేశారని, తాము అక్కడి పరిస్థితిని పరిశీలిస్తుండగా, అమెరికాలో తయారైన ఎం4 మెషిన్ గన్‌లతో కొంతమంది వచ్చి తమను నిర్బంధించారని చెప్పారు. రోడ్డుపై అడ్డగించి, అనంతరం ఐడీఎఫ్‌కు సమాచారం ఇవ్వగా, ఐడీఎఫ్ కూడా సెట్లర్ల పక్షం వహించిందని ఆయన తెలిపారు. తాము అక్కడున్నది అమెరికా కాంగ్రెస్ సభ్యుడేనని, అమెరికా ఎంబసీ ఆందోళన చెందుతోందని చెప్పినా ఐడీఎఫ్ సైనికులు నవ్వుతూ ఉండిపోయారని ఆయన ఆరోపించారు.

కాలిఫోర్నియా నుంచి ప్రాతినిధ్యం వహిస్తున్న భారత సంతతికి చెందిన ఖన్నా, పాలస్తీనా ప్రజల దృష్టికోణంలో ఆక్రమణను చూడాలని ఈ పర్యటన చేశానని చెప్పారు. మొదటిసారిగా పాలస్తీనియన్లతో కలిసి తిరిగానని, ఆక్రమణ వల్ల జరుగుతున్న మానవ నష్టాన్ని ప్రత్యక్షంగా గమనించానని పేర్కొన్నారు.

వెస్ట్ బ్యాంక్‌లో ఉన్న సమయంలో తాను ‘బ్రౌన్’ రంగువాడిగా తీవ్రంగా గుర్తించబడ్డానని, ప్రజలు తనను ముందు బ్రౌన్ గా, తర్వాత కాంగ్రెస్ సభ్యుడిగా, ఆపై అమెరికా పౌరుడిగా చూశారని ఖన్నా చెప్పారు. 21, 22 ఏళ్ల వయసున్న ఆ సెట్లర్ల కళ్లలో అహంకారం కనిపించిందని, తమ పన్నుల డబ్బుతో పనిచేస్తున్న ఐడీఎఫ్ సైనికులు ఎలాంటి జవాబుదారీ లేకుండా ప్రవర్తిస్తున్నారని విమర్శించారు.

అమెరికాలోని రాజకీయ వర్గాలు విరాళాల వల్ల కొనుగోలు చేయబడి, పాలస్తీనా మానవ హక్కులకు మద్దతు ఇవ్వడం లేదని ఆయన మండిపడ్డారు. గాజాలో మారణహోమం, వెస్ట్ బ్యాంక్‌లో వర్ణవివక్ష జరుగుతున్నా నోరు మెదపని వారు నైతికంగా దివాలా తీశారని, అలాంటి వారు మెడికేర్, కార్మికుల హక్కుల కోసం పోరాడతారని నమ్మలేమని ఖన్నా అన్నారు.

తన పర్యటన తర్వాత తాను ఏదో ఒక నిర్ణయం తీసుకోవడం గురించి బలంగా ఆలోచిస్తున్నానని, ఈ పర్యటన ఆ ఆలోచనను మరింత పటిష్టం చేసిందని ఖన్నా సూచించారు. పార్టీలో కొత్త నైతిక దిశ, ప్రపంచవ్యాప్తంగా మానవ హక్కులను గౌరవించే దృక్పథం అవసరమని పిలుపునిచ్చారు.