అమెరికా H-1B, విద్యార్థి వీసా నిబంధనల్లో భారీ మార్పులు: ట్రంప్ సర్కారు కీలక ప్రతిపాదనలు

అమెరికా H-1B వర్క్ వీసా, అంతర్జాతీయ విద్యార్థి వీసా నిబంధనలను కఠినతరం చేసే ప్రతిపాదనలను ట్రంప్ ప్రభుత్వం సిద్ధం చేస్తోంది. ఈ ప్రతిపాదనలు రాబోయే వారాల్లో అధికారికంగా వెల్లడయ్యే అవకాశం ఉంది.

H-1B వీసా విధానంలో మార్పులు తీసుకువచ్చే యోచనలో ట్రంప్ సర్కారు ఉంది. ప్రస్తుతం H-1B వీసాలకు ఏడాదికి 85,000 క్యాప్ ఉండగా, కొన్ని యూనివర్సిటీలు, పరిశోధన సంస్థలకు లాటరీ నుండి మినహాయింపు ఉంది. ఈ మినహాయింపును రద్దు చేయడం, వీసా ఖర్చులను భారీగా పెంచడం ఈ ప్రతిపాదనల్లో భాగంగా ఉన్నాయి. ఇప్పటికే కోర్టు కొట్టివేసిన లక్ష డాలర్ల ఫీజుతోపాటు, బయోమెట్రిక్ ఎంట్రీ ఎగ్జిట్ ఫీజు, వార్షిక సెర్చ్ చార్జ్ వంటి అదనపు భారం విధించాలని ప్రభుత్వం భావిస్తోంది. విదేశీ నిపుణుల కనీస వేతనాన్ని 21 నుంచి 33 శాతం వరకు పెంచడం ద్వారా ఉద్యోగాల్లో విదేశీయుల సంఖ్య తగ్గించాలన్నది మూడవ వ్యూహం.

అంతేకాకుండా, H-1B వీసా దుర్వినియోగంపై కూడా అమెరికా కార్మిక శాఖ దర్యాప్తు ప్రారంభించనుంది. కాగ్నిజెంట్ వంటి భారతీయ ఐటీ కంపెనీలపై నిఘా పెట్టనున్నారు.

విద్యార్థుల ఐచ్ఛిక ప్రాక్టికల్ ట్రైనింగ్ (OPT) పై కూడా ఆంక్షలు తేవాలని భావిస్తున్నారు. ప్రస్తుతం STEM రంగాల్లోని విద్యార్థులు OPT ను రెండేళ్లు పొడిగించుకోవచ్చు. అయితే కొత్త నిబంధనల ప్రకారం, శిక్షణ కోసం ప్రత్యేక వీసా ఎక్స్‌టెన్షన్ ప్రక్రియ అవసరం కావచ్చు. ఇది విద్యార్థుల శిక్షణ అవకాశాలను దెబ్బతీస్తుంది.

ఈ చర్యలన్నీ భారతీయులపై తీవ్ర ప్రభావం చూపనున్నాయి. 2024 నాటికి H-1B వీసా హోల్డర్లలో 71 శాతం మంది, విదేశీ విద్యార్థుల్లో 31 శాతం మంది భారతీయులే. నిబంధనలు కఠినతరమైతే అమెరికాలో చదువుకోవడం, ఉద్యోగం చేయడం మరింత కష్టతరం కానుంది.