అమెరికా F-1 విద్యార్థి వీసా నియమాలలో మార్పు? గరిష్ఠం నాలుగేళ్లు, గ్రేస్ పీరియడ్ 30 రోజులకు తగ్గింపు

అమెరికా F-1 స్టూడెంట్ వీసా నిబంధనలలో పెద్ద మార్పులు రానున్నట్లు కొన్ని మీడియా నివేదికలు సూచిస్తున్నాయి. ఈ ప్రతిపాదిత మార్పుల ప్రకారం, ఇకపై F-1 వీసాకు గరిష్టంగా నాలుగేళ్ల కాలం మాత్రమే ఉంటుంది. అంటే కోర్సు పూర్తయ్యేదాకా అమెరికాలో నివసించే ‘డ్యూరేషన్ ఆఫ్ స్టేటస్’ (D/S) సదుపాయాన్ని తొలగించనున్నారు. దీంతో విద్యార్థులు తరచూ వీసా పొడిగింపు కోసం దరఖాస్తు చేసుకోవాలి.

కోర్సు పూర్తయిన తర్వాత లభించే గ్రేస్ పీరియడ్‌ను 60 రోజుల నుంచి 30 రోజులకు కుదించనున్నట్లు ఆ నివేదికలు పేర్కొంటున్నాయి. అండర్ గ్రాడ్యుయేట్ విద్యార్థులు సబ్జెక్ట్ మార్చుకోవడంపై ఆంక్షలు పెట్టనున్నారు. గ్రాడ్యుయేట్ విద్యార్థులకు మరింత కఠినమైన నిబంధనలు వర్తిస్తాయి.

గడువు లోపు వీసా పొడిగించుకోకపోతే ఆ విద్యార్థిని అక్రమ నివాసిగా పరిగణిస్తారు. తిరిగి అమెరికాలోకి ప్రవేశించడాన్ని 10 సంవత్సరాల పాటు నిషేధించే అవకాశం ఉందని వార్తలు చెబుతున్నాయి. ఈ మార్పుల వల్ల దాదాపు 3.6 లక్షల మంది భారతీయ విద్యార్థులు ప్రభావితం కావచ్చని అంచనా.

అయితే, ఈ మార్పులపై అమెరికా ప్రభుత్వం నుంచి ఇంకా అధికారిక ప్రకటన రాలేదు. ప్రస్తుతం మీడియా నివేదికల ఆధారంగా మాత్రమే ఈ సమాచారం అందుతోంది. త్వరలో US విభాగం నుంచి స్పష్టత వచ్చే అవకాశం ఉంది.