అమెరికా F, J, I వీసా నిబంధనలు కఠినతరం – 3.3 లక్షల మంది భారత విద్యార్థులపై ప్రభావం

విదేశీ విద్యార్థులు, ఎక్స్ఛేంజ్ విజిటర్లు, మీడియా ప్రతినిధులకు సంబంధించిన F, J, I వీసా నిబంధనలను అమెరికా ప్రభుత్వం కఠినతరం చేయనుంది. ప్రభుత్వ పర్యవేక్షణ లేకుండా నిరవధికంగా ఉండేందుకు అనుమతించే పాత విధానానికి స్వస్తి పలుకుతూ, డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ కొత్త నిబంధనలను విడుదల చేసింది.

కొత్త నిబంధనల ప్రకారం, F-1 వీసాపై అమెరికా వెళ్లే విదేశీ విద్యార్థులు ఇకపై నాలుగేళ్లు మాత్రమే అక్కడ ఉండగలరు. నాలుగేళ్లకు మించి ఉండాలంటే, US Citizenship and Immigration Services (USCIS) ద్వారా స్టే ఎక్స్‌టెన్షన్ కోసం దరఖాస్తు చేసుకోవాల్సి ఉంటుందని అధికారులు తెలిపారు.

ఎఫ్-1 విద్యార్థులు గ్రాడ్యుయేషన్ పూర్తయిన తర్వాత అమెరికా వదిలి వెళ్లడానికి లేదా వీసా స్టేటస్ మార్చుకోవడానికి గతంలో 60 రోజుల గ్రేస్ పీరియడ్ ఉండేది. ఇప్పుడు దాన్ని 30 రోజులకు కుదించారు. J-1 ఎక్స్‌ఛేంజ్ విజిటర్లు, I వీసాపై వచ్చే మీడియా ప్రతినిధులకు కూడా నిర్దిష్ట కాల పరిమితి విధించనున్నారు.

ఈ నిబంధనలు అమలైతే, ప్రస్తుతం అమెరికాలో చదువుతున్న దాదాపు 3.3 లక్షల మంది భారతీయ విద్యార్థులపై తీవ్ర ప్రభావం పడనుంది. ఈ ప్రతిపాదన ప్రస్తుతం అమెరికా కాంగ్రెస్ పరిశీలనలో ఉంది. ఆమోదం లభిస్తేనే అమలులోకి వస్తుంది.