USCIS AR-11 ఫారంలో మార్పులు: వెంటనే దాఖలు చేయాలని న్యాయవాదుల సూచన

అమెరికాలోని భారతీయులు, ఇతర నాన్-ఇమ్మిగ్రెంట్‌లు తమ చిరునామా మార్పును తెలియజేసే USCIS AR-11 ఫారంలో పెద్ద మార్పులు వస్తున్నాయి. ఈ ఫారం కొత్త వెర్షన్‌లో ఉద్యోగం, విద్య, ప్రభుత్వ సహాయాలు వంటి అనేక కొత్త ప్రశ్నలు చేర్చారు. ఈ నెలాఖరులోపు ఈ కొత్త ఫారం అమల్లోకి రావచ్చునని హ్యూస్టన్‌కు చెందిన ఇమ్మిగ్రేషన్ న్యాయవాదులు రాహుల్ రెడ్డి, ఎమిలీ తెలిపారు.

ప్రస్తుతం సింపుల్‌గా ఉన్న AR-11 ఫారం కేవలం పాత, కొత్త చిరునామాలు మాత్రమే అడిగేది. కానీ కొత్త ఫారంలో పోర్ట్ ఆఫ్ ఎంట్రీ, ఎంట్రీ తేదీ, స్టేటస్ గడువు, ఉద్యోగి వివరాలు, విద్య, ప్రభుత్వ ప్రయోజనాల వినియోగం వంటి వివరాలు అడుగుతున్నారు. ఇది పబ్లిక్ ఛార్జ్ నిబంధనలను కఠినతరం చేయడంతో పాటు, నమోదు లేని వలసదారులపై నిఘా కోసం ఉపయోగించవచ్చని న్యాయవాదులు భావిస్తున్నారు.

ఈ నేపథ్యంలో ప్రస్తుతం సింపుల్ వెర్షన్‌లోనే AR-11 దాఖలు చేయాలని న్యాయవాదులు సూచించారు. చిరునామా మార్చుకున్న 10 రోజుల్లోపు ఈ ఫారం దాఖలు చేయాల్సి ఉంటుంది. గతంలో దాఖలు చేయకపోయినా, ఇప్పుడు వెంటనే చేస్తే మంచిదన్నారు. హెచ్-1బి, ఎఫ్-1, గ్రీన్ కార్డు హోల్డర్లు, బి-2 వీసాదారులు సహా అందరూ ఈ ఫారం దాఖలు చేయాలి.

గ్రీన్ కార్డు ఇంటర్వ్యూల విషయంలో, యూఎస్‌లోనే అడ్జస్ట్‌మెంట్ ఆఫ్ స్టేటస్ కొనసాగుతోంది. మే 21, 2026న వచ్చిన డిస్క్రెషన్ మెమో ఆచరణలో పెద్దగా ప్రభావం చూపలేదు. ఉద్యోగ ఆధారిత గ్రీన్ కార్డు దరఖాస్తుదారులకు ఇప్పటికీ ఇంటర్వ్యూలు సాఫీగా జరుగుతున్నాయి.

ఒప్టి (OPT) కార్డు జాప్యాలపై వ్యాఖ్యానిస్తూ, ప్రీమియం ప్రాసెసింగ్‌తో దాఖలు చేయడం ఉత్తమ మార్గమని, ఇప్పటికే దాఖలు చేసిన వారు ప్రీమియం ప్రాసెసింగ్‌కు అప్‌గ్రేడ్ చేసుకోవచ్చని తెలిపారు. స్టెమ్ ఎక్స్‌టెన్షన్ కోసం ఆటోమేటిక్ 180-రోజుల పొడిగింపు ఉన్నా, ఆ గడువులోపు కార్డు రాకపోతే ఇబ్బందులు ఎదురవుతాయన్నారు.

ఎయిర్‌పోర్టులో సెకండరీ ఇన్స్పెక్షన్‌లో సీబీపీ అధికారులు వాట్సాప్, ఈ-మెయిల్స్, బ్యాంక్ స్టేట్‌మెంట్లను తనిఖీ చేయవచ్చని, వీసా షరతులను ఉల్లంఘించినట్లు కనిపిస్తే ఎంట్రీ నిరాకరించే అవకాశం ఉందని హెచ్చరించారు. ఒప్టి, స్టెమ్ ఎక్స్‌టెన్షన్ విద్యార్థులు ప్రయాణాలు మానుకోవాలని సూచించారు.

గ్రీన్ కార్డు హోల్డర్లు నిరుద్యోగ భృతి తీసుకోవడంపై న్యాయవాదులు సందేహం వ్యక్తం చేశారు. ప్రస్తుత పరిస్థితుల్లో పబ్లిక్ ఛార్జ్ నిబంధనల కారణంగా రిస్క్ ఉండొచ్చని, సాధ్యమైతే దూరంగా ఉండాలన్నారు.