వాడపల్లి వెంకటేశ్వర స్వామి బ్రహ్మోత్సవాలు: కల్పవృక్ష వాహనంపై స్వామి దర్శనం

వాడపల్లి శ్రీ భూసమేత శ్రీ వెంకటేశ్వర స్వామి ఆలయంలో 14వ వార్షిక బ్రహ్మోత్సవాలు కొనసాగుతున్నాయి. ఉత్సవాల ఎనిమిదవ రోజు స్వామి వారికి విశేష పూజ కార్యక్రమాలు నిర్వహించారు.

ఉదయం శ్రీదేవి, భూదేవి సమేతంగా స్వామి వారు కల్పవృక్ష వాహనంపై భక్తులకు దర్శనం ఇచ్చారు. తొలుత విశ్వక్సేన పూజ, పుణ్యాహవచనంతో ఆధ్యాత్మిక కార్యక్రమాలు ప్రారంభమయ్యాయి.

అనంతరం అష్టకలసారాధన, స్నపన తిరుమంజనం, ప్రత్యేక తిరుప్పావడ సేవలను అర్చకులు శాస్త్రోక్తంగా నిర్వహించారు. ప్రధాన హోమాలు, దిగ్దేవత బలిహరణం, నీరాజనం, మంత్రపుష్ప సమర్పణ కార్యక్రమాలు చేపట్టారు.

ఉత్సవాల్లో భాగంగా గజవాహనంపై ఉభయ దేవేరులతో స్వామి వారు మాడవీధుల్లో భక్తులకు దర్శనం ఇచ్చారు. గోవింద నామస్మరణ నడుమ వాహన సేవ జరిగింది.

భక్తులు పెద్ద సంఖ్యలో తరలివచ్చి స్వామి వారిని దర్శించుకున్నారు. ఈ సందర్భంగా నిర్వహించిన సాంస్కృతిక కార్యక్రమాల్లో భక్తులు పాల్గొన్నారు.