యువ స్టార్ వైభవ్ సూర్యవంశీకి ₹12 కోట్ల బ్యాట్ డీల్ ఆఫర్

ఐపీఎల్ చరిత్రలో అతి పిన్న వయస్కుడైన ఆటగాడిగా రికార్డు సృష్టించిన వైభవ్ సూర్యవంశీకి భారీ బ్యాట్ స్పాన్సర్‌షిప్ ఆఫర్ వచ్చినట్లు క్రీడా వర్గాల నుంచి సమాచారం అందుతోంది.

ప్రస్తుతం 15 ఏళ్ల వయసున్న వైభవ్, గతంలో ఒక బ్యాట్ కంపెనీతో సంవత్సరానికి ₹50 లక్షల స్పాన్సర్‌షిప్ ఒప్పందాన్ని కుదుర్చుకున్నారు. ఐపీఎల్‌లో ఆయన ప్రదర్శించిన ఆటతీరు, అతని స్టార్ ఇమేజ్‌కు దీటుగా ఇప్పుడు మరో బ్యాట్ తయారీ సంస్థ ₹12 కోట్ల మెగా డీల్‌ను ప్రతిపాదించిందని తెలుస్తోంది.

ఈ ఆఫర్‌పై అధికారిక ధ్రువీకరణ ఇంకా రాలేదు. అయితే, ఇటీవలే ఓ ప్రముఖ న్యూట్రిషన్ హెల్త్ డ్రింక్ ప్రకటనలోనూ వైభవ్ కనిపించి యాడ్ ప్రెజెన్స్‌తో ఆకట్టుకున్నారు. పలు అగ్రశ్రేణి బ్రాండ్లు కూడా ఆయనను ఎండార్స్‌మెంట్ కోసం సంప్రదిస్తున్నట్లు సమాచారం.

బీహార్‌లోని మిడిల్ క్లాస్ కుటుంబం నుంచి వచ్చిన వైభవ్, ఐపీఎల్‌లో అడుగుపెట్టిన తర్వాత అతి తక్కువ కాలంలోనే గ్లోబల్ బ్రాండ్ వాల్యూను సంపాదించుకోవడం క్రికెట్ వర్గాలలో చర్చనీయాంశంగా మారింది. కేవలం ఒక సీజన్‌లోనే స్పాన్సర్‌షిప్ విలువ ₹50 లక్షల నుంచి ₹12 కోట్లకు ఎగబాకడం అతని మార్కెటింగ్ సంభావ్యతను చూపుతోంది.