గద్వాల జిల్లాలో వనామి రొయ్యల సాగు; పీఎంఎంఎస్వై పథకం వివరాలు

జోగులాంబ గద్వాల జిల్లాలో సాంప్రదాయ చేపల వేటతో పాటు వనామి రొయ్యల సాగుపై ఆసక్తి పెరుగుతోందని మత్స్యశాఖ అధికారులు తెలిపారు. జిల్లాలో 375 చెరువులు ఉన్నాయి. వీటిపై వేలాది మత్స్యకార కుటుంబాలు ఆధారపడి ఉన్నాయి.

వనామి రొయ్యల సాగులో నీటి నాణ్యత, చెరువు నిర్వహణ, నాణ్యమైన విత్తనం, మేత యాజమాన్యం, వ్యాధుల నియంత్రణపై శ్రద్ధ అవసరమని అధికారులు సూచిస్తున్నారు. చిన్న నిర్లక్ష్యం కూడా పెద్ద నష్టానికి దారితీయవచ్చు.

ముందుగా ఎకరాకు 500 కిలోల సున్నం వేసి ఎండబెట్టి, తర్వాత పశువుల ఎరువు వేసి కొద్దిగా నీరు వదులుతారు. నీరు ఆకుపచ్చ రంగుకు మారిన తర్వాత మిగతా నీటిని విడుదల చేస్తారు. 12 నుంచి 15 దశల వనామి పోస్ట్ లార్వాలను నాణ్యమైన హాచరీ నుంచి ఎంపిక చేసి ఎకరాకు 50 వేల నుంచి లక్ష వరకు వదులుతారు.

మొదటి వారం రోజుకు ఒకసారి, రెండో వారం రెండుసార్లు, మూడో వారం మూడుసార్లు మేత వేస్తారు. రొయ్యల బరువు పెరిగేకొద్దీ మేత పరిమాణం పెంచుతారు. పంట 90 నుంచి 100 రోజుల్లో చేతికి వస్తుంది. కిలోకు 30 రొయ్యల కౌంట్ వస్తే మంచి పంటగా భావిస్తారు.

రాష్ట్ర ప్రభుత్వం వనామి సాగుకు అనుమతి ఇచ్చింది. ప్రధానమంత్రి మత్స్య సంపద యోజన (PMMSY) కింద ఒక హెక్టార్ యూనిట్ కాస్ట్ రూ.7 లక్షలు. ఎస్సీ/ఎస్టీ, మహిళలకు 60 శాతం, ఇతరులకు 40 శాతం సబ్సిడీ వర్తిస్తుంది.

అయితే ఇది బ్యాక్ ఎండ్ సబ్సిడీ. రైతులు ముందుగా పాండ్ నిర్మాణం చేయాలి. కనీసం ఎకరాకు ఒక పాండ్ ఉండేలా నిర్మించాలి. గ్రౌండ్ వాటర్, వ్యవసాయ, ఇరిగేషన్, రెవెన్యూ శాఖల పరిశీలన తర్వాత అనుమతి ఇస్తారు. మొదటి పంట తర్వాత సబ్సిడీ విడుదల అవుతుంది.