వరలక్ష్మీ వ్రతం 2026: ఐదు శ్రావణ శుక్రవారాలు, పూజా విధానం, చేయాల్సినవి

శ్రావణ మాసంలో పౌర్ణమి ముందు వచ్చే శుక్రవారం వరలక్ష్మీ వ్రతాన్ని ఆచరిస్తారు. ఈ ఏడాది శ్రావణ మాసంలో ఐదు శుక్రవారాలు వస్తున్నాయని ఆధ్యాత్మిక వేత్తలు తెలిపారు.

ఈ వ్రతాన్ని మహిళలు కుటుంబ సౌఖ్యం, మాంగల్య బలం, ఐశ్వర్యం కోసం చేస్తారు. మొదటి శుక్రవారం కుదరని వారు మిగిలిన శుక్రవారాల్లో చేసుకోవచ్చని పండితులు చెప్పారు. పూజకు ప్రత్యేక ముహూర్తం లేదు. ఉదయం లేదా సాయంత్రం వీలైన సమయంలో చేసుకోవచ్చు.

పూజ రోజు తెల్లవారుజామున లేచి తలస్నానం చేయాలి. శుభ్రమైన బట్టలు ధరించాలి. పూజ స్థలాన్ని పసుపు నీళ్లతో శుభ్రం చేయాలి. మామిడి తోరణాలు, పూలతో అలంకరించుకోవచ్చు. నైవేద్యంగా పరమాన్నం, పూర్ణాలు, బూరెలు, పులిహోర, రవ్వ కేసరి వంటివి పెట్టవచ్చు. సామర్థ్యం మేరకు పాలు, బెల్లం, పండ్లు పెడితే కూడా సరిపోతుందని పండితులు సూచించారు.

పూజను ప్రదర్శన కోసం కాకుండా భక్తితో చేయాలని వారు సూచించారు. సోషల్ మీడియా పబ్లిసిటీ కోసం పూజ చేయడం, ఇతరులతో పోల్చుకోవడం వద్దన్నారు. మాటల్లో కఠినత్వం ఉండకూడదు. వాయనాలు ఇచ్చేటప్పుడు ఎవరినీ తక్కువగా చూడకూడదు. ఉపవాసం పూర్తిగా చేయాల్సిన అవసరం లేదు. పాలు, జ్యూసు, పండ్లు తీసుకోవచ్చు. ఆరోగ్యం పాడవుతుందనుకుంటే ఒత్తిడి తీసుకోవద్దు.

పురాణ కథనం ప్రకారం చారుమతి అనే భక్తురాలికి అమ్మవారు స్వప్నంలో దర్శనమిచ్చి ఈ వ్రతం గురించి చెప్పారని పండితులు వివరించారు.