వేములవాడ శ్రీ రాజరాజేశ్వరాలయంలో దేవీ నవరాత్రి ఉత్సవాలు.. 11 నుంచి 20 వరకు నిర్వహణ

వేములవాడ శ్రీ రాజరాజేశ్వర ఆలయంలో దేవీ నవరాత్రి ఉత్సవాలు ఈ నెల 11వ తేదీ నుంచి 20వ తేదీ వరకు జరగనున్నాయి. పది రోజుల పాటు రాజరాజేశ్వరి అమ్మవారు భక్తులకు వివిధ రూపాల్లో దర్శనం ఇవ్వనున్నారు.

11వ తేదీన స్వస్తి పుణ్యాహవచనం, అఖండ దీప స్థాపన, కలశ స్థాపన, గాయత్రీ ప్రతిష్ఠతో ఉత్సవాలు ప్రారంభమవుతాయి. ఆశ్వయుజ శుద్ధ పాడ్యమి నుంచి నవమి వరకు తొమ్మిది రోజుల పాటు శరన్నవరాత్రి మహోత్సవాలు నిర్వహిస్తారు. దక్షిణ కాశీగా పిలిచే ఈ క్షేత్రంలో ఈ ఉత్సవాలు జరుగుతాయి.

ఈ నేపథ్యంలో 11వ తేదీ నుంచి 20వ తేదీ వరకు స్వామివారి నిత్య కళ్యాణం రద్దు చేసినట్లు ఆలయ అధికారులు తెలిపారు. దేవీ నవరాత్రి ఉత్సవాలను ఆలయంలో ఏకాంతంగా నిర్వహిస్తున్నారు. భక్తులు అమ్మవారి పూజ చేసుకునేందుకు అవసరమైన ఏర్పాట్లు చేశారు. భీమేశ్వర ఆలయాన్ని రంగురంగుల విద్యుత్ దీపాలతో అలంకరించారు.

నవరాత్రి రోజుల్లో ప్రతిరోజూ ఉదయం, సాయంత్రం అమ్మవారికి లలితా సహస్రనామం, అష్టోత్తర శతనామాలు, దేవీ చతుషష్టోపచార పూజలు జరుగుతాయి. రాజరాజేశ్వర స్వామికి ఏకాదశ రుద్రాభిషేకం నిర్వహిస్తారు. గణపతికి మహాభిషేకం, అనుబంధ ఆలయాల్లో నిత్య అర్చనలు ఉంటాయి.