ప్రేక్షకుల అభిరుచి ఊహించడం కష్టమని దర్శకుడు వెంకటేష్ మహా

దర్శకుడు వెంకటేష్ మహా తన కొత్త చిత్రం ‘రావు బహదూర్’ ప్రెస్ మీట్‌లో మాట్లాడారు. ప్రేక్షకుల అభిరుచి ఊహించడం చాలా కష్టమని ఆయన అన్నారు.

“సగటు అంచనాలున్న సినిమా వందల కోట్లు వసూలు చేయడం, అద్భుతమైన చిత్రం ఆశించిన స్థాయిలో ఆడకపోవడం చూస్తున్నాం. నేనూ ప్రేక్షకుడినే. విజయవాడ గాంధీనగర్‌లో పెరిగాను” అని తెలిపారు.

“నా తొలి చిత్రం ‘కేరాఫ్ కంచరపాలెం’ 60-70 లక్షల బడ్జెట్‌తో తీస్తే 10 కోట్లు వసూలు చేసింది. ‘ఉమా మహేశ్వర ఉగ్ర రూపస్య’కు మంచి పేరు వచ్చింది. ‘రావు బహదూర్’ కూడా ప్రేక్షకులకు చెరగని అనుభూతిని ఇస్తుంది” అని వివరించారు.

ఇటీవల మహిళా దినోత్సవం సందర్భంగా తాను ఒక సినిమాలోని ఒక అంశాన్ని చర్చించానని, అది కమర్షియల్ సినిమాలకు లేదా ఏ నటుడికీ, దర్శకుడికీ వ్యతిరేకంగా కాదని స్పష్టం చేశారు. “నా వ్యాఖ్యలను కావాలని వక్రీకరించారు. ఒక పీఆర్వో ఫోన్ చేసి 15 రోజులు మీడియాకు దూరంగా ఉండమని సలహా ఇచ్చారు” అని ఆయన చెప్పారు.

“నాకు జర్నలిజం అంటే చాలా ఇష్టం. ఫిల్మ్ మేకర్ కాకపోతే జర్నలిస్ట్ అయ్యుండేవాడిని” అని వెంకటేష్ మహా తెలిపారు.