‘విశ్వనాథన్ సన్స్’ తమిళమే: హీరో భాషలో సినిమాలు తీస్తున్న దర్శకులు

తాజాగా ప్రముఖ దర్శకుడు వెంకి అట్లూరి తన కొత్త సినిమా ‘విశ్వనాథన్ సన్స్’ విషయంలో ఓ కీలక ప్రకటన చేశారు. ఈ సినిమా పూర్తిగా తమిళ చిత్రమేనని, బైలింగ్వల్ కాదని ఆయన స్పష్టం చేశారు.

గతంలో ఒక భాషా నటుడితో మరో భాషా దర్శకుడు సినిమా తీసేటప్పుడు రెండు భాషల్లో ఏకకాలంలో చిత్రీకరించేవారు. కానీ ఇటీవల దర్శకులు ఈ ధోరణికి స్వస్తి చెపుతున్నారు. హీరోకు ఉన్న ప్రధాన మార్కెట్ అతని సొంత భాషలోనే ఉంటుందని, ఆ భాషలో సినిమా తీసి తర్వాత డబ్బింగ్ చేయడమే మంచిదని వారు భావిస్తున్నారు.

ఇదే బాటలో గతంలో వంశీ పైడిపల్లి విజయ్ హీరోగా ‘వారసుడు’ సినిమాను, అనుదీప్ శివకార్తికేయన్ హీరోగా ‘ప్రిన్స్’ చిత్రాన్ని ప్రత్యేకంగా తమిళంలోనే తెరకెక్కించి ఇతర భాషల్లోకి డబ్బింగ్ చేశారు. తమిళ దర్శకులు కూడా తెలుగు హీరోలతో నేరుగా తెలుగు సినిమాలు తీస్తున్నారు. బైలింగ్వల్ అని చెప్పి అనవసరంగా మరో భాష నేటివిటీని బలవంతంగా చొప్పించే ప్రయత్నం చేయడం లేదు.

ఈ ట్రెండ్ దక్షిణాదికే పరిమితం కాలేదు. బాలీవుడ్ వెళ్లిన సౌత్ దర్శకులు కూడా హిందీ స్టార్లతో స్ట్రెయిట్ హిందీ సినిమాలే చేస్తున్నారు. షారుక్ ఖాన్ ‘జవాన్’, రణ్‌బీర్ కపూర్ ‘యానిమల్’, ‘జాట్’ వంటి చిత్రాలు ఇలా పక్కా హిందీ చిత్రాలుగా రూపొంది పెద్ద విజయాలు సాధించాయి.

ఒకప్పటి పాన్‌-ఇండియా బైలింగ్వల్ ప్రయోగాలకు భిన్నంగా, ఇప్పుడు మేకర్స్ హీరో మాతృభాషలో సినిమాలు నిర్మించడమే సేఫ్ రూట్ అనే నిర్ణయానికి వచ్చినట్లు తెలుస్తోంది.