వికారాబాద్‌లో వరిపంట ఎండిపోయింది: యాలాల్ రైతుల ఆవేదన, పరిహారం డిమాండ్

వికారాబాద్ జిల్లా యాలాల్ మండలం దేవనూరు గ్రామంలో సుమారు 200 ఎకరాలకు పైగా వేసిన వరిపంట పూర్తిగా ఎండిపోయింది. వర్షాలు లేకపోవడం, బోర్లలో నీళ్లు పడకపోవడం, కరెంటు కోతల వల్ల పంట దెబ్బతిన్నట్టు రైతులు చెప్తున్నారు.

దేవనూరు రైతు బోడుక శ్రీనివాస్ ఆరు ఎకరాల్లో సన్న వరి వేశారు. ఈసారి వానలు బాగా లేవని, కరెంటు సరిగా రావడం లేదని ఆయన తెలిపారు. పాత బోరు పనిచేయకపోవడంతో కొత్త బోరు వేయించినట్టు, దాంతో పెట్టుబడి సుమారు ₹4.5 లక్షలకు చేరిందని చెప్పారు. బంగారం తాకట్టు పెట్టి అప్పు చేసి సాగు చేశామని ఆయన అన్నారు.

దేవనూరులో 75 శాతం మంది రైతులు వరి వేస్తారని, ఈసారి అందులో 50 శాతం పంట ఎండిపోయిందని రైతులు తెలిపారు. ఎకరాకు ₹20,000 నుంచి ₹25,000 వరకు పెట్టుబడి పోయిందని, అంతే మొత్తంలో నష్టం వచ్చిందని వారు చెప్తున్నారు. నీళ్లు ఉన్నప్పుడు కరెంటు ఉండదని, కరెంటు ఉన్నప్పుడు నీళ్లు ఉండవని ఒక రైతు వివరించారు.

గ్రామానికి చెందిన ఒక మహిళా రైతు మాట్లాడుతూ, తన భర్త ప్రమాదంలో చనిపోయిన తర్వాత తానే సాగు చేస్తున్నానని చెప్పారు. బోర్లలో నీళ్లు పడటం లేదని, డబ్బులు పెట్టి నీళ్లు కొన్నా సరిపోవడం లేదని ఆమె తెలిపారు. కూలీలు, నీళ్లు, ఎరువులకు భారీ ఖర్చు అయినా పంట చేతికి రాలేదని ఆమె ఆవేదన వ్యక్తం చేశారు.

తాండూరు నియోజకవర్గంలోని నాలుగు మండలాలను ప్రభుత్వం కరువు మండలాలుగా ప్రకటించినట్టు రైతులు చెప్తున్నారు. అయితే ఇప్పటివరకు ఏ అధికారి తమ పొలాలను పరిశీలించలేదని వారు ఆరోపిస్తున్నారు. రైతు భరోసా రెండు విడతలు మాత్రమే అందిందని, రుణమాఫీ పూర్తిగా జరగలేదని కూడా వారు చెప్తున్నారు. ఎకరాకు ₹15,000 ఇస్తామన్న హామీ నెరవేరలేదని వారి ఆరోపణ.

యాలాల్ మండలానికి చెందిన BRS ప్రజాప్రతినిధి పంట నష్టం జరిగిన పొలాలను పరిశీలించారు. గతంలో 24 గంటల కరెంటు ఉండేదని, ఇప్పుడు మూడు-నాలుగు గంటలే వస్తోందని ఆయన అన్నారు. కరువుకు ప్రభుత్వ విధానాలే కారణమని ఆయన ఆరోపించారు. ఈ అంశాలపై ప్రభుత్వం లేదా వ్యవసాయ శాఖ స్పందన లభ్యం కాలేదు.

ఎండిపోయిన పంటలను అధికారులతో పరిశీలించించి, వెంటనే ఎకరాకు నష్టపరిహారం చెల్లించాలని రైతులు కోరుతున్నారు.