విశాఖలో శ్రీ జగన్నాథ స్వామి రథోత్సవం ప్రారంభం – జూలై 26 వరకు దశావతార దర్శనం

విశాఖపట్నం టౌన్ కొత్త రోడ్డులోని శ్రీ జగన్నాథ స్వామి ఆలయంలో వార్షిక దశావతార మహోత్సవాలు మరియు రథోత్సవం జూలై 16 సాయంత్రం ఘనంగా ప్రారంభమయ్యాయి. తొలిరోజు స్వామి వారు మత్స్యావతారంలో భక్తులకు దర్శనమిచ్చారు. బలభద్రుడు, సుభద్రాదేవితో కలిసి ప్రత్యేక రథంపై స్వామి వారిని టౌన్ కొత్త రోడ్డు నుండి టర్నర్ చౌట్రీ మందిరం వరకు ఊరేగింపుగా తీసుకెళ్లారు.

ఆలయ ఈవో టి. రాజగోపాల్ రెడ్డి తెలిపిన వివరాల ప్రకారం, ఈ ఉత్సవాలు జూలై 26 వరకు కొనసాగుతాయి. ఈ తొమ్మిది రోజుల్లో ప్రతి రోజు వేర్వేరు అవతారాలలో స్వామి వారిని దర్శించుకోవచ్చు. జూలై 17న మత్స్య అవతారం, 25వ తేదీ తొలి ఏకాదశి రోజున శేషపాను అవతారంలో దర్శనం లభిస్తుంది. నిత్యం ఉదయం 6 గంటల నుండి రాత్రి 9:30 వరకు భక్తులు దర్శనం చేసుకోవచ్చు. పది రోజుల్లో సుమారు 2.5 నుండి 3 లక్షల మంది భక్తులు హాజరవుతారని అంచనా.

భక్తుల సౌకర్యం కోసం విస్తృత ఏర్పాట్లు చేసినట్లు ఈవో తెలిపారు. ప్రతిరోజు మధ్యాహ్నం వెయ్యి మందికి అన్న సంతర్పణ, సాయంత్రం 4 నుండి 9 వరకు చౌట్రీ ప్రాంగణంలో సాంస్కృతిక కార్యక్రమాలు నిర్వహిస్తారు. ఫ్రీ బస్సు పథకం వల్ల దూర ప్రాంతాల నుండి మహిళలు ఎక్కువగా వచ్చే అవకాశం ఉండటంతో క్యూ లైన్లు పెంచడంతో పాటు పోలీస్ బందోబస్తు కూడా అదనంగా ఏర్పాటు చేశారు. తాగునీరు, మజ్జిగ, పిల్లలకు బిస్కెట్లు, మొబైల్ టాయిలెట్లు వంటి సౌకర్యాలు కల్పించారు.

రథయాత్ర సుమారు ఒక కిలోమీటర్ దూరం సాగింది. తిరుగు ప్రయాణం జూలై 26 సాయంత్రం 5 గంటలకు స్థానిక ఎమ్మెల్యే ప్రారంభిస్తారు. ఏర్పాట్ల కోసం దేవాదాయ శాఖ, పోలీస్, రెవెన్యూ శాఖలతో సమన్వయ సమావేశాలు నిర్వహించినట్లు ఈవో వివరించారు.