విశాఖలో UKG విద్యార్థి మృతి: హోమ్‌వర్క్ చేయలేదని టీచర్ కొట్టారు

విశాఖపట్నం వన్ టౌన్ లోని లిటిల్ గార్డెన్ స్కూల్‌లో UKG విద్యార్థి ప్రణయ్ తేజ్ (6) మృతి చెందాడు. హోమ్‌వర్క్ చేయలేదని టీచర్ చెంపపై కొట్టిన కొద్దిసేపటికే అతను కుప్పకూలిపోయాడు.

ఘటన సమయంలో టీచర్ విద్యార్థుల హోమ్‌వర్క్ చెక్ చేస్తున్నారు. ప్రణయ్ తేజ్ ఏడుస్తూ టీచర్ ముందుకు వచ్చాడు. అతను హోమ్‌వర్క్ చేయలేదని గుర్తించిన టీచర్ చెంపపై కొట్టింది. కొట్టిన వెంటనే బాలుడు టీచర్ మీదకు పడిపోయాడు.

స్కూల్ సిబ్బంది వెంటనే ఆసుపత్రికి తరలించారు. అప్పటికే చనిపోయినట్టు వైద్యులు ధ్రువీకరించారు. టీచర్ కొట్టిన కారణంగానే మరణం సంభవించిందని కుటుంబ సభ్యులు ఆరోపిస్తున్నారు.

స్కూల్ సిసిటీవీ ఫుటేజీలో ఈ దృశ్యాలు నమోదయ్యాయి. పోలీసులు ఫుటేజీని పరిశీలిస్తూ దర్యాప్తు చేస్తున్నారు. పోస్టుమార్టం నివేదిక ఆధారంగా మృతికి అసలు కారణం నిర్ధారించాల్సి ఉంది.

కేజీహెచ్ మార్చురీ వద్ద కుటుంబ సభ్యులు గుమిగూడి ఆందోళన వ్యక్తం చేశారు. స్కూల్ మేనేజ్మెంట్, టీచర్ పై చర్యలు తీసుకోవాలని డిమాండ్ చేస్తున్నారు.