వరిలో సమగ్ర కలుపు, ఎరువుల యాజమాన్యంపై వరంగల్ శాస్త్రవేత్త సూచనలు

తెలుగు రాష్ట్రాల్లో వరి నాట్లు ముమ్మరంగా జరుగుతున్నాయి. ఈ నేపథ్యంలో, వరంగల్ ప్రాంతీయ వ్యవసాయ పరిశోధన స్థానం శాస్త్రవేత్త మాధవి రైతులకు సమగ్ర కలుపు, ఎరువుల యాజమాన్యంపై కీలక సూచనలు చేశారు. ఆమె తెలిపిన వివరాల ప్రకారం

నారుమడిలో విత్తనం వేసిన 8-10 రోజుల తర్వాత బ్యూటాక్లోర్ లేదా ప్రెటిలాక్లోర్ ప్లస్ సేఫ్నర్ 25 మి.లీ. ని 5 లీటర్ల నీటిలో కలిపి పిచికారీ చేయాలి. వెడల్పు ఆకు గడ్డి జాతి కలుపును నివారించడానికి 15-20 రోజుల వ్యవధిలో సహెలాఫాప్-బ్యూటైల్ 1.5 మి.లీ./లీటర్ పిచికారీ వేయాలి. నారుమడికి ఎకరాకు సరిపడా రెండు గుంటలకు నత్రజని, భాస్వరం, పొటాషియం ఒక్కొక్క కిలో చొప్పున విత్తనం వేసిన వెంటనే వేయాలి. మరో కిలో నత్రజని 10-12 రోజులకు చేర్చాలి.

ప్రధాన పొలంలో నాటిన 3-5 రోజుల్లోపు బ్యూటాక్లోర్ 1 నుంచి 1.5 లీటర్ లేదా ప్రెటిలాక్లోర్ 500-600 మి.లీ. లేదా బెన్సల్ఫిరాన్-మిథైల్+ప్రెటిలాక్లోర్ గుళికలు 4 కేజీలను 20 కేజీల ఇసుకలో కలిపి చల్లాలి. 15-20 రోజులకు లేదా 3-4 ఆకుల దశలో ఫెనాక్సిలం+సహెలాఫాప్-బ్యూటైల్ 800 మి.లీ. లేదా ట్రయోఫామ్+ఇథాక్సీ సల్ఫీరాన్ 90 గ్రాములను ఎకరాకు 200 లీటర్ల నీటిలో కలిపి పిచికారీ చేయాలి.

ఎరువుల యాజమాన్యంలో, ఎకరాకు 48 కేజీల నత్రజని, 24 కేజీల భాస్వరం, 16 కేజీల పొటాష్ వేసుకోవాలి. పొటాష్‌ను ఎర్రనేలల్లో రెండు దఫాలుగా (దమ్ము, పొట్ట దశ) వేయాలి. నత్రజని మూడు దఫాలుగా (దమ్ము, పిల్లల దశ, చిరుపొట్ట దశ) వేయాలి. సంక్లిష్ట ఎరువులు వాడరాదు. వేపపూత యూరియానే వాడాలి. ఎరువులతో క్రిమి సంహారకాలు కలపకూడదు; బురద పొలంలో వేసి 24 గంటల తర్వాత నీరు పెట్టాలి.

మెట్ట వరిలో 20% అదనంగా నత్రజని (60 కేజీలు) వేయాలి. విత్తిన 24-48 గంటల్లోపు పెండిమిదానిన్ 1.2 లీటర్ లేదా ప్రెటిలాక్లోర్+పైరోజో సల్ఫిరాన్-ఇథైల్ గుళికలు 800 గ్రాములను 200 లీటర్ల నీటిలో కలిపి పిచికారీ చేయాలి. ఐరన్ లోపం వల్ల ఆకులు తెల్లగా/ఎర్రగా మారితే, అన్నబేది 5 గ్రాములు, నిమ్మ ఉప్పు 1 గ్రాము లీటర్ నీటికి కలిపి పిచికారీ చేసి పంటను కాపాడుకోవచ్చు.