యువతి పెళ్లి ఆపడానికి పోస్టర్లు అంటించిన యువకుడి అరెస్ట్

సిద్దిపేట జిల్లా దుబ్బాక మండలం పెద్దగుండవెల్లిలో యువతి పెళ్లి ఆపడానికి ప్రయత్నించిన వెంకటేష్ కుమార్ అనే యువకుడిని పోలీసులు అరెస్ట్ చేశారు. అతనికి సహకరించిన ఐదుగురు స్నేహితులను కూడా అరెస్ట్ చేసినట్లు పోలీసులు తెలిపారు.

పోలీసుల కథనం ప్రకారం, ఎన్సాన్పల్లికి చెందిన ఓ యువతిని వెంకటేష్ గత కొంతకాలంగా ప్రేమ పేరుతో వెంటపడుతున్నాడు. ఆమెకు తంగల్లపల్లికి చెందిన వ్యక్తితో వివాహం నిశ్చయమైంది. ఈ పెళ్లిని ఆపాలనే దురుద్దేశంతో వెంకటేష్ తన స్నేహితులతో కలిసి కుట్ర పన్నాడు.

ఆ యువతి ఫోటోను పోస్టర్ రూపంలో ముద్రించి, తనతో సంబంధమున్నట్లు అవాస్తవ ప్రచారం చేశాడు. ఈ పోస్టర్లను తంగల్లపల్లి, ఎన్సాన్పల్లి గ్రామాల్లోని గోడలపై రాత్రిపూట అంటించాడు. దీంతో బాధిత కుటుంబానికి తీవ్ర పరువు నష్టం కలిగింది.

యువతి కుటుంబ సభ్యులు పోలీసులకు ఫిర్యాదు చేశారు. కేసు నమోదు చేసుకున్న పోలీసులు నిందితులను అరెస్ట్ చేసి దర్యాప్తు ప్రారంభించారు.