యూట్యూబర్ రచన గుర్జార్ ఇంట్లో ₹10 లక్షల చోరీ

మధ్యప్రదేశ్‌లోని శివపూరి జిల్లా మోహాని గ్రామంలో యూట్యూబర్ రచన గుర్జార్ ఇంట్లో దొంగతనం జరిగింది. శనివారం తెల్లవారుజామున కుటుంబం గాఢనిద్రలో ఉన్న సమయంలో దొంగలు ఇంట్లోకి చొరబడి, సుమారు ₹8 నుంచి ₹10 లక్షల విలువైన బంగారు, వెండి ఆభరణాలు, నగదు, ఎనర్జీ డ్రింక్స్‌ వంటి వస్తువులను తీసుకెళ్లారు.

దొంగలు ఇంటి చుట్టూ ఉన్న ఫెన్సింగ్‌ కట్ చేసి, చెక్క నిచ్చెన సాయంతో ప్రవేశించారు. కుటుంబం పడుకున్న గదిని బయట నుంచి లాక్ చేసి, సీసీటీవీ కెమెరాలను తిప్పేశారు. తెల్లవారుజామున 4 గంటలకు మేల్కొన్న కుటుంబ సభ్యులు తలుపు తీయలేక పోవడంతో బంధువులకు ఫోన్ చేశారు. వారు వచ్చి తలుపులు తెరిచిన తర్వాత ఇంట్లో ఏమీ లేవని గ్రహించారు.

రచన గుర్జార్ బుందేల్‌ఖండ్ జానపద పాటల ద్వారా సామాజిక మాధ్యమాల్లో మంచి అనుచరగణం సంపాదించుకున్నారు. ఇటీవల ఓ వీడియోలో తాను ధరించిన భారీ బంగారు ఆభరణాలను ప్రదర్శించారు. ఈ చోరీ వెనుక స్థానికుల హస్తం ఉండవచ్చని పోలీసులు అనుమానిస్తున్నారు. కేసు నమోదు చేసి దర్యాప్తు కొనసాగుతోంది.