యష్రాజ్ స్పై యూనివర్స్ చిత్రాలకు ఆదరణ క్షీణత; ‘ఆల్ఫా’కు తక్కువ రేటింగ్

ఒకప్పుడు యష్ రాజ్ ఫిలిమ్స్ స్పై థ్రిల్లర్ చిత్రాలపై ప్రేక్షకుల్లో ఆసక్తి ఎక్కువగా ఉండేది. కానీ టైగర్ 3 విడుదలతో ఈ యూనివర్స్ చిత్రాలకు ఆదరణ క్షీణించడం మొదలైంది. వార్ 2 సైతం అంచనాల మేరకు విజయం సాధించలేకపోయింది. తాజాగా జూలై 3న విడుదలైన ‘ఆల్ఫా’ కూడా ప్రేక్షకులను ఆకట్టుకోలేకపోయింది.

ఆలియా భట్, శర్వరి వాగ్ ప్రధాన పాత్రల్లో నటించిన ‘ఆల్ఫా’ స్పై థ్రిల్లర్ జానర్‌లో వచ్చిన సినిమా. మునుపటి చిత్రాల మాదిరిగానే ఇందులోనూ రొటీన్ స్టోరీని పునరావృతం చేశారన్న విమర్శలు వ్యక్తమయ్యాయి. సీనియర్ బాలీవుడ్ విమర్శకులు ఈ చిత్రానికి తక్కువ రేటింగ్ ఇచ్చారు. గమనించదగ్గ విషయం ఏమిటంటే ఆల్ఫా కథలో ఆదిత్య చోప్రా సోదరుడు ఉదయ్ చోప్రా జోక్యం చేసుకున్నప్పటికీ సినిమా ఫలితం ఆశించినంతగా రాలేదు.

ఈ నేపథ్యంలో రాబోయే ‘టైగర్ 4’, ‘పఠాన్ వర్సెస్ టైగర్’ వంటి యూనివర్స్ చిత్రాలను నిలిపివేయాలని కొంతమంది ప్రేక్షకులు వ్యాఖ్యానిస్తున్నారు. యష్రాజ్ ఫిలిమ్స్ అధిపతి ఆదిత్య చోప్రా ఈ పరిణామాలపై ఎలా స్పందిస్తారనేది ఆసక్తికరంగా మారింది.