తాత్కాలికంగా నిలిపిన 500 జేబీఎం ఎలక్ట్రిక్ బస్సుల్లో 150 తిరిగి సేవల్లోకి

కరీంనగర్ డిపోలో జేబీఎం ఎలక్ట్రిక్ బస్సులో జరిగిన అగ్ని ప్రమాదం తర్వాత నిలిపివేసిన 500 బస్సుల్లో 150 తిరిగి ప్రయాణికుల సేవల్లోకి వచ్చాయి. టెక్నికల్ నిపుణులు ఫిట్నెస్ సర్టిఫికెట్ జారీ చేసిన అనంతరం వీటిని రోడ్డెక్కించినట్టు TGSRTC అధికారులు తెలిపారు.

కరీంనగర్ డిపోలో గతంలో రెండు జేబీఎం బస్సులు ఎలక్ట్రిక్ షార్ట్ సర్క్యూట్‌కు గురై ఒకటి పూర్తిగా దగ్ధం కాగా, మరొక బస్సులో మంటలు చెలరేగాయి. ఈ నేపథ్యంలో రాష్ట్రవ్యాప్తంగా ఉన్న 500 జేబీఎం బస్సులన్నింటినీ నిలిపివేసి సాంకేతిక తనిఖీలు చేపట్టారు.

టిజిఎస్ఆర్టిసి ఇంజనీర్లు, చైనా నుంచి వచ్చిన జేబీఎం సాంకేతిక నిపుణులు వివిధ డిపోల్లో ఈ బస్సులను పరిశీలించారు. పూర్తిస్థాయి తనిఖీల తర్వాత 150 బస్సులకు ఫిట్నెస్ సర్టిఫికెట్ ఇవ్వగా, వాటిని ఎంజిబిఎస్, జేబిఎస్, హనుమకొండ, నల్గొండ, నిజామాబాద్ మార్గాల్లో నడుపుతున్నారు.

ప్రస్తుతం మిగిలిన 350 బస్సుల భద్రతా తనిఖీలు కొనసాగుతున్నాయి. హైదరాబాద్‌లోని బస్‌భవన్ కమాండ్ కంట్రోల్ ద్వారా ఈ బస్సుల ఆపరేషన్లను నిశితంగా పర్యవేక్షిస్తున్నారు. త్వరలో అన్ని బస్సులను పునరుద్ధరించనున్నట్లు అధికారులు తెలిపారు.