ట్రంప్ సుంకాల నిర్ణయాన్ని 25 అమెరికా రాష్ట్రాలు కోర్టులో సవాల్

అమెరికా అధ్యక్షుడు డొనాల్డ్ ట్రంప్ ఇటీవల 60 వాణిజ్య భాగస్వామి దేశాలపై విధించిన అదనపు సుంకాలను సవాలు చేస్తూ 25 రాష్ట్రాలు కోర్టును ఆశ్రయించాయి. న్యూయార్క్ అటార్నీ జనరల్ లెటిషియా జేమ్స్ నేతృత్వంలో అరిజోనా, ఒరేగాన్ సహా 25 రాష్ట్రాలు అమెరికా అంతర్జాతీయ వాణిజ్య న్యాయస్థానంలో ఈ దావా దాఖలు చేశాయి.

1974 నాటి అమెరికా వాణిజ్య చట్టంలోని సెక్షన్ 301 కింద ట్రంప్ ప్రభుత్వం ఈ సుంకాలు విధించింది. వెట్టి చాకిరి ద్వారా తయారైన ఉత్పత్తుల దిగుమతులను నియంత్రించడమే లక్ష్యమని ప్రభుత్వం ప్రకటించింది. అయితే, ఈ సుంకాల వల్ల వినియోగదారులకు, చిన్న వ్యాపారాలకు అదనపు ఖర్చు భారం పడుతుందని రాష్ట్రాలు ఆరోపిస్తున్నాయి. ప్రభుత్వం చట్టబద్ధమైన పరిమితులను దాటి వ్యవహరిస్తోందని ఆరోపించాయి.

గతంలో అమెరికా సుప్రీంకోర్టు, అంతర్జాతీయ అత్యవసర ఆర్థిక అధికారాల చట్టం (IEEPA) కింద సుంకాలు విధించే అధికారం ప్రభుత్వానికి లేదని స్పష్టం చేసింది. ఈ తీర్పు తర్వాత ట్రంప్ ప్రపంచవ్యాప్తంగా 10% తాత్కాలిక సుంకాలు విధించారు. వాటి గడువు జూలై 24తో ముగియడంతో 60 దేశాలపై 10 శాతం నుంచి 12.5 శాతం వరకు కొత్త సుంకాలు అమలులోకి వచ్చాయి.

ఈ విధానంలో భారత్‌కు కొంత ఊరట లభించింది. ప్రారంభంలో భారత్‌పై 12.5 శాతం సుంకం ప్రతిపాదించినా, భారత్ వెట్టి చాకిరి నిరోధక చట్టాల అమలును వేగవంతం చేయడంతో ఈ సుంకం 10 శాతానికి తగ్గించారు.

కొత్త సుంకాలను ప్రభుత్వం తగిన విధంగా వివరించలేదని, సెక్షన్ 301 దర్యాప్తు కేవలం గతంలో కోర్టులు తోసిపుచ్చిన పన్నులను మళ్లీ అమలు చేయడానికి ఒక సాకు మాత్రమేనని రాష్ట్రాలు వాదిస్తున్నాయి. ఇదే అంశంపై చిన్న వ్యాపార సంస్థలు గత జులైలో రెండు దావాలు వేసిన నేపథ్యంలో ఇప్పుడు 25 రాష్ట్రాలు ఏకమై న్యాయస్థానాన్ని ఆశ్రయించడం అమెరికా రాజకీయాల్లో చర్చనీయాంశంగా మారింది.