అబిడ్స్ ISKCON మందిరం 50వ వార్షికోత్సవం ఆగస్టు 15 నుంచి 18 వరకు

హైదరాబాద్‌లోని అబిడ్స్ ISKCON మందిరం 50వ వార్షికోత్సవం (గోల్డెన్ జూబ్లీ) ఆగస్టు 15 నుంచి 18 వరకు జరగనుంది. ఈ నాలుగు రోజుల ఉత్సవాల్లో భక్తులు పెద్ద సంఖ్యలో పాల్గొనవచ్చని ఆలయ ప్రతినిధులు తెలిపారు.

ఈ మందిరంలోని ప్రధాన దేవతామూర్తులు శ్రీ శ్రీ రాధా మదన్‌మోహన్. 50 ఏళ్ల కిందట ISKCON వ్యవస్థాపక ఆచార్య శ్రీల ప్రభుపాద స్వయంగా ఈ విగ్రహాలను ప్రతిష్టించారు. హైదరాబాద్‌కు వచ్చిన సమయంలో ప్రభుపాదులు ఇక్కడి గదిలోనే బస చేశారు. ఆ గదిని ప్రస్తుతం పునరుద్ధరిస్తున్నారు. జూబ్లీ సందర్భంగా ఆ గదిని భక్తుల సందర్శనకు అందుబాటులోకి తీసుకురానున్నారు.

ప్రభుపాదులతో పాటు ఫ్రాన్స్‌కు చెందిన ఆనందమయ ప్రభు హైదరాబాద్‌లోనే ఉండి తెలుగు పుస్తకాల ఎడిటింగ్ వంటి సేవలు చేశారు. ఆలయంలో గోశాల ఉంది. మోయినాబాద్‌లోని గిరిరాజ్ రిట్రీట్ సెంటర్‌లో మరిన్ని ఆవులు, వసతి సౌకర్యాలు ఉన్నాయి. అక్కడి నుంచి కొన్ని ఆవులను ఇక్కడికి తీసుకొచ్చి భక్తులు సేవ చేసుకుంటారు.

ఈ ఏడాది ISKCON 60వ వార్షికోత్సవం (జూలై 13, 2026) కూడా జరుపుకుంటోంది. ప్రపంచవ్యాప్తంగా 100కు పైగా భాషల్లో భగవద్గీత పుస్తకాలు విరివిగా పంచుతున్నారు. భారతదేశంలో రోజుకు 15 లక్షల మందికి ఉచిత అన్నదానం జరుగుతోంది.

అబిడ్స్ ఆలయ ఆవరణలో శ్రీల ప్రభుపాద భవనం నిర్మాణం త్వరలో ప్రారంభం కానుంది. ఇందులో వేద పాఠశాల తరగతులు, భక్తుల కోసం వసతి గృహం, ప్రసాద వితరణ ఏర్పాట్లు ఉంటాయి.