మహబూబ్‌నగర్‌లో ACB దాడులు: రూ.15 వేలు లంచం తీసుకుంటూ ACB వలకు చిక్కిన సూపరింటెండెంట్

మహబూబ్‌నగర్ జిల్లాలో అవినీతికి అడ్డుకట్ట పడింది. సర్వే అండ్ ల్యాండ్ రికార్డ్స్ డిపార్ట్‌మెంట్ సూపరింటెండెంట్ బొమ్మిరెడ్డి వెంకటేశ్వర్ రెడ్డి లంచం తీసుకుంటూ ACB అధికారులకు పట్టుపడ్డాడు. గ్రామ మ్యాప్ సవరణ కోసం రైతు నుంచి లంచం డిమాండ్ చేసిన ఈ అధికారిని ACB అధికారులు రెడ్‌హ్యాండెడ్‌గా పట్టుకున్నారు.

భూత్పూర్ మండలం కరివేన గ్రామానికి చెందిన ఒక రైతు తన పొలానికి సంబంధించిన వివరాలు సరిగ్గా లేకపోవడంతో వాటిని సరిచేయించుకునేందుకు గ్రామ మ్యాప్ కోసం దరఖాస్తు చేసుకున్నాడు. ఈ పని కోసం సూపరింటెండెంట్ ఇప్పటికే రూ.10 వేలు లంచం తీసుకున్నాడు. అంతేకాదు మరో రూ.15 వేలు డిమాండ్ చేశాడు.

లంచం ఇవ్వలేక విసిగిపోయిన రైతు ACB అధికారులను ఆశ్రయించాడు. ACB అధికారులు కేసు నమోదు చేసుకొని సూపరింటెండెంట్ వెంకటేశ్వర్ రెడ్డిని రూ.15 వేలు లంచం తీసుకుంటూ రెడ్‌హ్యాండెడ్‌గా పట్టుకున్నారు. విలేజ్ మ్యాప్ కరెక్షన్ పని చేయించుకోవడానికి రైతు లంచం ఇచ్చిన సమయంలో అధికారులు అక్కడికి చేరుకొని అరెస్ట్ చేశారు.