అయోధ్య రామాలయ విరాళాల చోరీ: రూ.2-3 కోట్ల దొంగతనం జరిగినట్లు సిట్ వెల్లడి

అయోధ్యలోని రామాలయం నిర్మాణ సమయంలో వసూలైన విరాళాల చోరీ కేసులో సిట్ దర్యాప్తులో కీలక విషయాలు వెలుగులోకి వచ్చాయి. ఆలయ విరాళాల లెక్కింపు ప్రక్రియలో నిమగ్నమైన సిబ్బందే రెండు మూడు నెలల పాటు డబ్బు తస్కరించినట్లు సిట్ గుర్తించింది.

దర్యాప్తు అధికారుల ప్రకారం, మొదట్లో ఉద్యోగులు జేబులో రూ.500 నోట్లను దాచుకునేవారు. పట్టుబడకపోవడంతో క్రమంగా కట్టల కట్ట నగదు అపహరించడం మొదలుపెట్టారు. మొత్తం రూ.2 నుండి 3 కోట్ల వరకు చోరీ జరిగినట్లు అంచనా. ఈ మొత్తాన్ని సిసిటీవీ నిఘా వ్యవస్థలోని లోపాలను ఆసరాగా చేసుకుని దొంగిలించినట్లు తేలింది.

విరాళాల సేకరణ, లెక్కింపు, బ్యాంకు జమ విధానాల్లో నిబంధనలు సరిగ్గా అమలు కావడం లేదని సిట్ గుర్తించింది. ఈ కేసులో అవినాష్ శుక్లాను ప్రధాన నిందితుడిగా పేర్కొంది సిట్. అతనికి వ్యతిరేకంగా బలమైన సాక్ష్యాలు లభించాయి.

మరోవైపు, నిందితులు భక్తుల నుంచి విరాళాలు వసూలు చేసేందుకు నకిలీ రసీదు పుస్తకాలు సృష్టించినట్లు విచారణలో తేలింది. శ్రీరామ జన్మభూమి తీర్థక్షేత్ర ట్రస్ట్ పేరుతో ఉన్న ఒక నకిలీ రసీదు పుస్తకాన్ని సిట్ అధికారులు స్వాధీనం చేసుకున్నారు. నిందితులు ఈ నకిలీ రసీదులనే నిజమైనవిగా నమ్మించి డబ్బు వసూలు చేసినట్లు పోలీసులు తెలిపారు.