బంజారా హిల్స్‌లో నటిపై లైంగిక వేధింపులు: కాస్టింగ్ ఆర్టిస్ట్ ప్రసాద్‌పై కేసు నమోదు

బంజారా హిల్స్‌లో ఓ సినీ నటి, కాస్టింగ్ ఆర్టిస్ట్ ప్రసాద్ తనను లైంగికంగా వేధించాడని పోలీసులకు ఫిర్యాదు చేశారు. బంజారా హిల్స్ పోలీస్ స్టేషన్‌లో అధికారిక ఫిర్యాదు నమోదైంది.

నటి తెలిపిన వివరాల ప్రకారం, ఇటీవల ఆమె ఓ సినిమాలో హీరోయిన్ ఫ్రెండ్ పాత్ర పోషించారు. షూటింగ్ ముగిసిన తర్వాత కూడా ప్రసాద్ తనకు రూ.90,000 పారితోషకం చెల్లించలేదని, రూ.38,000 క్యాబ్ ఖర్చులతో కలిపి మొత్తం రూ.1.28 లక్షలు రావాలని ఆమె ఆరోపిస్తున్నారు. డబ్బులు అడిగితే ప్రసాద్ ఈరోజు, రేపు అంటూ కాలయాపన చేశాడని నటి ఆరోపించారు.

మరిన్ని సినిమా అవకాశాలు ఇప్పిస్తానని నమ్మించి, బంజారా హిల్స్‌లోని ఓ నిర్మాత కార్యాలయానికి రావాలని ప్రసాద్ ఆమెకు ఫోన్ చేశారు. అక్కడికి వెళ్లిన తర్వాత కారులో ఆమెను లైంగికంగా వేధించి, తన కోరిక తీర్చాలని ఒత్తిడి చేశారని నటి ఆరోపించారు. నటి అక్కడి నుంచి తప్పించుకుని బయటపడింది.

ఈ కేసులో నటి తల్లి, ప్రసాద్‌ల మధ్య జరిగిన ఫోన్ సంభాషణ ఆడియో కీలక సాక్ష్యంగా మారింది. ఈ సంభాషణలో తల్లి, ప్రసాద్ మహిళలను మోసం చేస్తున్నాడని, రాత్రివేళ ఫోన్ చేస్తున్నాడని, బెదిరిస్తున్నాడని ఆరోపించారు. నటి ఫిర్యాదు చేస్తే చంపేస్తానని కూడా ప్రసాద్ బెదిరించాడని పోలీసులు తెలిపారు.

పోలీసులు బీఎన్ఎస్ సెక్షన్లు 75, 79, 351(2) కింద కేసు నమోదు చేశారు. ప్రసాద్ ప్రస్తుతం పరారీలో ఉండగా, అతని కోసం పోలీసులు గాలిస్తున్నారు. నటి దాఖలు చేసిన సాక్ష్యాలను పోలీసులు స్వీకరించారు. 15 ఏళ్లుగా సినీ పరిశ్రమలో పనిచేస్తున్న ఈ నటి, ఈ వేధింపుల వల్ల తీవ్ర మానసిక ఒత్తిడికి గురయ్యానని తెలిపారు.